سلطة السيزر .. Caesar Salad

Admin عدد المساهمات : 4080 تاريخ التسجيل : 07/04/2013

سلطة السيزر .. Caesar Salad
by Top Chef
سلطة السيزر يمكن تكون أشهر سلطة في العالم وفي نفس الوقت أكثر سلطة مستهلكة ،في كل مكان تعد سلطة سيزر ، كل كافيه و كل مطعم ( بغض النظر عن نوعية الأكل اللي يقدمة المطعم ) تكون موجودة السلطة عنده وطبعا في البيوت أكثر و أكثر . الشي المؤسف في الموضوع إن على كثرة تواجدها ونسخها إلا إنها في الغالب نسخ جدا مشوهة أو مطبقة بشكل جدا سيء. أغلب سلطات السيزر تعاني من نفس المشاكل : خس ميت ، خلطة غير متوازنة وثقيلة أو طعمها ماله علاقة بالسيزر ، خلطة كثيرة ، مكونات كثيرة ما تمشي مع بعض .. إلخ إلخ …

سلطة السيزر مالها أي علاقة بالأكل الإيطالي ، هي سلطة فيها نكهات البحر المتوسط . بس هي سلطة أمريكية. سبب التسميه موضوع خلاف ، بعض الناس يقولون إنها مخترعة في فندق سيزر بالاس في لاس فيجاس ومن هنا جاء الإسم بس الرأي الغالب هو إنها تسمت على إسم صاحب المطعم اللي سواها أول مرة وكان إسمه سيزار كارديني. يقال إن الطبق أخترع ( زي أكلات كثير ) عن طريق الصدفة ، كان المطعم زحمة و أضطروا إنهم يطلعون بهذي السلطة اللي كانت تنخلط قدام الزباين على الطاولة. السلطة الأصلية عبارة عن سلطة خس روماين romaine ( خس عربي موب أمريكي زي ما يسوي الغالبية ) مع قطع خبز محمص croutons و دريسنج مكون من ليمون و سمك أنشوجة و بارمزان و صوص وستشير ومثبت بصفار بيض. السلطة مافيها أي دجاج أو ربيان أو غيره زي ما كثير ناس صاروا يعتقدون إنه لازم، إضافة مثل هذي المكونات كان حركة من المطاعم إنهم يحولون السلطة لطبق رئيسي . الدريسنج هذا مكوناته بالضبط ما معه زبادي ولا معه طحينه أو أي خرابيط ثانية.

المقادير :

للدريسنج :

نص فص ثوم ( أو حسب الرغبة )
حبتين سمك أنشوجة ( أو حسب الرغبة )
صفار بيضه
ملعقتين صغار خردل ديجون
ملعقة كبيرة مويه
رشة صوص وستشير
عصير ليمونة
ملعقة كبيرة بارمزان مبشور يفضل من نوع بارميجانو ريجانو parmigiano regiano

ربع كوب زيت زيتون من أفضل نوع
ربع كوب زيت عادي
ملح وفلفل

للخبز المحمص :

خبز فرنسي أو إيطالي قديم
زيت زيتون
ملح وفلفل
فص ثوم مهروس
أوريجانو مجفف

للسلطة :

راسين خس عربي طازج وجديد

بارمزان مبشور أو شرايح بارمزان

* سمك الأنشوجة ضروري هنا هو اللي راح يعطي النكهة المميزة للصوص، الأنشوجة تذوب في الصوص ويبقى طعمها بس. إذا تبون معلومات أكثر عن وش الأنشوجة شوفوا الموضوع هنا.

* صفار البيض بعد مهم هنا ، الطعم ماله بديل و هو اللي راح يعطي الصوص القوام الكريمي. الصوص هذا ما يعيش في الثلاجة أكثر من يومين و نعم البيض بيكون ني بس لا تخافون بدون ريحة أو غيره. اللي يقرف من البيض الني مافيه بديل بيعطي نفس الطعم.

* نستخدم كمية من الزيت النباتي بدال زيت الزيتون في الخلطة عشان ما يطغى طعم زيت الزيتون بنكهتة أو مرارته ( لو كانت موجودة ) على باقي المكونات.

* السلطة في النهاية سلطة خس ، لو الخس ميت السلطة بتفقد كل طعمها. أشتروا خس عربي طازج وجديد ونظفوه و نشفوه زين قبل الإستخدام عشان ما تخفف المويه اللي تطلع منه الخلطة.

* الخس الجديد نعرفه بإننا نشوف الجذر حقه . الجذر مفروض يكون أبيض ما يكون وردي أو أسود . بعض الأحيان بنلاقي الخس جديد ( يعني أبيض من تحت ) بس الأوراق ذابله شوي وهذا طبيعي في كل الورقيات وله حل. اللي تسوونه عشان يرجع الخس زي ماكان ويصير قوي من جديد هو إنكم تغسلونه بعدين تنقعونة نص ساعة تقريبا في مويه باردة مجمده يعني مع قطع ثلج وبتلاقونه رجع زي ماكان، ماراح تتخيلون كيف النص ساعة هذي بتفرق في قوام الخس.

* مهم جدا إنكم تنشفون الخس قبل الإستخدام، كمية المويه اللي تعلق عليه جدا كبيرة وبتخفف أي خلطة تنحط عليه ولا راح تخليها تلصق عليه. أحسن حل لتجفيف الورقيات هو إستخدام الجهاز حق التجفيف salad spinner الجهاز يدور بسرعة و المويه تطلع من الجنب. الحل الثاني هو إنك تفردونه بين فوطتين مطبخ وتجففونه زين. لا تهملون هذي الخطوة !

سلطة السيزر .. Caesar Salad 51-ebPgAnwL._SL500_AA280_

سلطة السيزر .. Caesar Salad 51-ebPgAnwL._SL500_AA280_

الطريقة :

للدريسنج :

نحط صفار البيضه مع الثوم و الأنشوجة و الخردل و الوستشير و المويه وعصير الليمون في خلاط ونخلط إلين يعطينا خليط ناعم بعدين من فوق و الخلاط شغال نضيف الزيت شوي شوي إلين نوصل للقوام اللي يعجبنا. نذوق الدريسنج ونعدل حسب الرغبة ، في حال حبينا الصوص يكون أثقل نزيد زيت و إذا حبيناه أخف نزيد عصير ليمون أو مويه. آخر شي نحط البارمزان ونخلطه معهم شوي. قوام الدريسنج مفروض يكون كثيف بإنه يغطي الخس بس في نفس الوقت ما يكون سايل يسيل في الصحن أو ثقيل أكثر من اللازم زي المايونيز.

للخبز المحمص :

نشيل القشر عن الخبز ( لو حبينا ) بعدين نقطعه بالسكين أو بيدنا بالحجم اللي يعجبنا. نحط الخبز في صحن ونرش عليه زيت زيتون وملح وفلفل و أوريجانو و الثوم المهروس بعدين نحطه في صينية فرن مغطية بقصدير ( أسهل للتنظيف بس ) وندخله الفرن على ٣٧٥ إلين يتحمر من جميع الجهات.

للسلطة :

دايما أي خضار خضراء ينحط عليها شي حامض ( زي الخلطة هنا ) تذبل وتخرب بسرعة عشان كذا لا تخلطون هذي السلطة إلا قبل التقديم علطول. قطعوا الخس بسكين جدا حادة أو أحسن بعد بيدكم هذا بيقلل السواد و الخراب اللي يطلع على أطراف الخس غير إنه بيعطي السلطة شكل عشوائي حلو. شخصيا أحب أستخدم قلب الخس بس و أخلي الأوراق الخارجية لشي ثاني بس كل واحد وذوقه.

في صحن نحط الخس و الخبز ونحط عليهم شوي من الخلطة بعدين نزينها بجبن بارمزان لو حبينا. كمية الخلطة مفروض تكون واضحة بس ما تكون كثيرة بحيث ما نذوق أي شي ثاني.

» صوص سلطة السيزر
» طريقة عمل صوص سلطة السيزر
» سلطة الجرجير بالدجاج والصوص + سلطة الجرجير بالطماطم والجبن
» سلطة الفجل مع صويا صوص ... خطوات تحضير سلطة الفجل
» سلطة كول سلو