المقبلات و الأطباق الرئيسية .. Mains and Entrees 1

Admin عدد المساهمات : 4080 تاريخ التسجيل : 07/04/2013

المقبلات و الأطباق الرئيسية .. Mains and Entrees

شوربة التوم يم .. Tom Yum Soup

الكافر لايم نوع من أنواع الحمضيات . ثمر هذا الشجر مر ومافيه عصير كثير وما يستخدم في الغالب في الطبخ اللي يستخدم هو الورق و بشر الثمر بس . هذي الشوربة يميزها التوازن بين الحار و الحامض عشان كذا هو مكون مهم هنا .. عموما لو ما لقيتيه مررررررره مشي حالك بعصير اللايم العادي . بس حاولي تدورينه بيكون غير ترى .
٤ أكواب مويه
كوب ربيان مقشر ومنزوع العرق اللي في الظهر
نص علبة فطر طازج ويفضل لو كان فطر شيتاكي مقطعة أنصاص
حبتين لايم ( ليمون أخضر )
عود ليمون جراس
٣ أوراق كافر لايم
تقريبا ملعقتين كبار صوص السمك fish sauce
١/٢ كوب كزبرة مفرومه شوي
٣ حبات فلفل حار يفضل يكون من النوع التايلندي الأحمر النحيف
قطعي الليمون جراس ٤ قطع تقريبا . بعدين أضربي كل جزأ بظهر السكين في أماكن متفرقه عشان تطلعين نكهته .
أغلي المويه . بعدين حطي الليمون جراس ، الفطر ، الفلفل التايلندي ، ورق الكافر لايم و أطبخيهم شوي بس . حطي الربيان وأول ما يقلب برتقالي قفلي النار عشان ما يصير ناشف .
حطي من صوص السمك إلين تصير مالحة حسب ذوقك ( في الأكل التايلندي صوص السمك بديل للملح تقريبا ) .
أعصري اللايم بعد حسب ذوقك . بعدين حطي الكزبرة وشيلي الكافر لايم و الليمون جراس كونها ما تنوكل . وقدميها . الشوربة ماتاخذ دقايق في التجهيز .
————————————————————————————————————————————————————————–
البروكلي بالفرن .. Roasted Broccoli

طريقتي المفضله في البروكلي وخصوصا إذا كنت بسويه بدون صوص أو أي شي …
طبعا نفس الطريقة تنفع مع الزهرة أو الهليون ( أسباراجس).
سخني الفرن ل ٤٢٥
بعدين قطعي البروكلي ورشيها بزيت زيتون + ملح وفلفل أسود + فص ثوم تقريبا لكل راس بروكلي.
ودخليها الفرن و أقلبيها بعد نص الوقت تقريبا … بعدين رجعيها الفرن ..
بعد ما تستوي طلعيها ورشي عليها بارمزان مبشور وهي حاره شوي بس … وذوقي أحلى طبق جانبي …
————————————————————————————————————————————————————————–
البطاطس المشوية (الكاملة) .. Roasted Potatoes

سخني الفرن على ٣٧٥ بعدين أخرمي البطاطس بشوكه في مناطق متفرقة عشان ما تنفجر.
بعدين أدهنيها بزيت وملح بس !! حطيها بلفرن على الشبك بدون صينية
وخليها تطبخ إلين تلاقين إنها صارت لو دخلتي سكينة صغيره تطلع بسهولة و أستوت من جوا .
أفتحيها من فوق وحطي ساور كريم + زبده + كراث + جبن أي أي أي شي تحبين تقدرين تحطينه معها … نفس الطريقة ممكن تستخدم مع البطاطس الحلوه
————————————————————————————————————————————————————————–
البيف ستروجونوف .. Beef Stroganof

كيلو لحم بقر فيليه مينيوون مقطع صغار
٣ ملاعق زبده
٣/٤كوب بصل مقطع
نص كيلو فطر طازج
٢ وربع ملعقة طحين
١/٣كوب مرق لحم
١/٣كوب قشطة خفق
١/٢كوب ساور كريم
ملعقتين خردل يفضل خردل ديجون
ملعقتين شبت وملعقتين بقدونس مفروم
ملح وفلفل خشن
أول شي سخني مقلة على حرارة عاليه يفضل تكون ستانلس ستيل . بعدين و المقلة تسخن نشفي اللحم زييييييييييين عشان يتحمر صح . الحين تبلي اللحم بملح وفلفل بعدين حطي شوي زيت ( موب زيت زيتون ) في المقلة و أطبخي اللحم ولاتحركينه كثير عشان يتلون صح . أطبخيه إلين بس يتلون ٣-٤ دقايق بعدين شيلي اللحم على صحن. الحين شيلي الدهن الزايد اللي في المقلة بعدين حطي الزبده وعلى حرارة وسط أطبخي البصل و حاولي تمسحين قاع القدر عشان يلين القطع البنية اللي فيها الطعم . الحين أرفعي الحرارة شوي وحطي الفطر ورشة ملح وفلفل و أطبخي الفطر إلين يتلون ١٠- ١٥ دقيقة تقريبا. الحين رشي الطحين فوق الفطر و حركي ونزلي الحرارة إلى أقل من وسط وحركيها حوالي دقيقة .الحين أضيفي المرق، القشطة ، الساور كريم ، الخردل ، و المويه اللي نزلت من اللحم . وخليها تطبخ على غلية جدا جدا خفيفة إلين تثقل .لا تخلينها تغلي !!! أنتبهي .الحين رجعي اللحم للقدر مع الصوص وبعدين أضيفي الأعشاب ذوقي الصوص و اللحم وشوفي إذاتحتاج ملح أو فلفل بعدين قدمي.
————————————————————————————————————————————————————————–
طماطم مجففه .. Oven dried tomatoes

أول شي تسوينه إنك تشرين كمية طماط من نوعية جيدة كمية كبيرة عشان تسوين كمية كبيرة، حاولي تختارين طماط مستوي وطعمه جيد. بعدين تقطعين الطمام أنصاص بالطول و ترصينهم في صينية وتخلين الوجه المقطوع فوق . بعدين تقطعين ثوم وتخلطينه مع زيت زيتون وملح وفلفل . طبعا هذي الأساسية بس أبدعي هنا حطي اللي تبين . وبعدين تدهنين وجه الطماط بهذا الزيت.
شغلي الفرن على ٢٠٠ فهرنهايت وحطي الطماط فيها ..
راح تاخذ حوالي ٨ ساعات عشان تنشف نسبيا .
لو تبينها شوي رطبة عشان تاكلينها خليها وقت أقل .
المسألة في النهاية على راحتك أحيانا أخليها ساعتين و آكلها كطبق جانبي و أحياناأخليها ٤ أو ٥ساعات .
بس إذا تبينها قريبة من الطماط المجفف خليها وقت أطول.بعد ماتخلطين خليها تبرد
و أحفظيها في علبة تتقفل حوالي أسبوع ،
أو لو سويتي كمية وتبين تحفظينها لوقت طويل
يمديك تحطينها في علبة أو مرطبان و تغطينها بزيت زيتون
طبعا تأكدي إن الزيت يغطيها
كونه هو اللي بيحفظها .
بعدين غطي العلبة وحطيها في الثلاجة، تقعد كذا الظاهر سنة ما عندك مشكلة.
————————————————————————————————————————————————————————–
تتبيلة رجل الخروف .. Roast leg of lamb

خردل ديجون + ثوم + روزماري + ملح خشن مطحون ( يعني موب ساسا ) وفلفل بعد خشن مطحون + زيت .
أخلطيهم مع بعض وسوي فيها زي المعجون بعدين
أدهني الرجل فيها،خليها تتبل في الثلاجة طول الليل . بعدين ثاني يوم طلعيها من الثلاجة قبل بساعتين وخليها برا الثلاجة إلين توصل لحرارة الغرفه . بعدين شغلي الفرن على حرارة عاليه عشان تحمرين اللحم أول شي ، يعني ٤٢٥ تقريبا .
حطي اللحم في الفرن في الرف الأوسط وخليه إلين يتحمر شوي تقريبا ربع إلى نص ساعة بعدين نزلي الحرارة إلى ٣٥٠ وخليه يكمل طبخ إلين يستوي .
————————————————————————————————————————————————————————–
حلقات البصل .. Onion Rings

الطريقة سهل ، تنقعينها في لبن !!! موب حليب ! لبن ساعه أو أقل . بعدين تغمسينها في طحين مع النكهات اللي تحبين
بعدين في اللبن بعدين في الطحين مره ثانيه
بعدين تقلينها في زيت حار ٣٧٥ تقريبا لو عندك ميزان حرارة .
————————————————————————————————————————————————————————–
شاورما الدجاج .. Chicken Shawarma

تبلي صدور الدجاج قبلها بيوم ، بس خليها صدور كامله لا تقطعينها .
كوب زبادي
ملعقتين كبار عصير ليمون
٤فصوص ثوم مهروسة
١/٢ملعقة صغيرة شطة
ملعقة كبيرة خل
ملعقة كبيرة بصل مفروم
ملح وفلفل
زيت زيتون
جوزة طيب
هذي تتبيلة أساسية بس لو تبين عدلي عليها على كيفك
وترى الكميات بس خطوط عامة يعني غيريها بعد على كيفك.
بعد يوم طلعي الصدور من التتبيلة . أنا أشويها في الفرن ،الفرن فيه شواية من فوق شغليها وخليها تسخن زين بعدين أرفعي صينية الفرن على الرف العلوي .شيلي شوي من التتبيلة حقت الدجاج يعني لا تخلين الدجاج مغطى بالتتبيلة عشان ما تنحرق بالفرن ، حطي الصدور في الصينية وعلى الشواية أطبخيها إلين تستوي و أقلبيها مرة هذي الطريقة تعطي نفس تأثير الشاورما العادية بفرق بسيط هو إن الدجاج ما يجي ناشف زي الشورما العادي يجيك رطب . الشورما لو لاحظتي دجاج مشوي لا أكثر ترى . بعد ما يستوي الدجاج قطعية صغار وخلصنا !! لو تبين بعد يمديك تسوين معاها الخبز العربي.
————————————————————————————————————————————————————————–
شوربة الطماطم الإيطالية .. Italian cream of tomato soup

شوربة الطماط الإيطالية سهلة وهذي الطريقة أنا متأكد إنها راح تعجبك
بس أرجع و أقول دايما جودة الأشياء هي اللي بتعطي الشوربة طعمها .
كيلو ونص طماط مشكل ( كل ما شكلتي أطعم حطي طماط صغار وكبار ولو عندك الطماط اللي يجي بالعرق حقه حطيه) .
٨فصوص ثوم
بصلتين كبار مقطعة أجنحة
١/٢كوب زيت زيتون
لتر تقريبا مرق دجاج
ورقتين غار
4 ملاعق كبيرة زبدة .
١/٢كوب ريحان مقطع
٣/٤كوب قشطة خفق
أول شي سخني الفرن على ٤٥٠
قطعي الطماط أنصاص
بعدين حطي الطماط و البصل و الثوم في صينية فرن كبييييييييرة
تأكدي إنها تكون مفرقة في الصينية موب كل شي فوق بعض .
بعدين رشي عليها ملح وفلفل و زيت زيتونحطيها في الفرن حوالي نص ساعة
أو إلين يبدأ يتكرمل شوي.بعدين في قدر كبير حطي الطماط المحمصة و المرق وورق الغار
و أطبيخها تقريبا 20 دقيقة .بعدين شيلي ورق الغار و حطي الريحان وبعدين أطحنيها .
رجعيها على النار بعدين عدلي كثافة وملوحة الشوربة على كيفك .
آخر شي حطي القشطة و الزبدة وحركي إلين تنخلط زين…زينيها بزيادة ريحان. .
————————————————————————————————————————————————————————–
شوربة العدس .. Lentil Soup
بصلة كبيرة مقطعة
٤فصوص ثم مقطعة شرايح
ملعقة صغيرة كمون
ورقة غار
كوب عدس أحمر مغسول و تأكدي مافيه حصى
5أكواب مرق دجاج ( يفضل الله يرضى عليك بعدي عن الماجي)
كوب مويه
بقدونس و ليمون للتزيين
أطبخي البصل في زيت على حرارة هادية إلين يقلب شفاف .
أضيفي الثوم و الكمون و الغار و أطبخيه دقيقة زيادة بعدين حطي المرق و العدس و الملح و الفلفل
أطبخيها 30 – 45 دقيقة .
الحين لو تحبين أطحنيها أو أطحني نصها وخلي نصها و عدلي الملح و الفلفل و كثافة الشوربة على كيفك .
بعدين زينيها بالبقدونس .
————————————————————————————————————————————————————————–
شوربة الفطر بالشعير .. Mushroom Barley Soup

٢كوب شعير حب
كوب ونص مرق دجاج للشعير + ٤ أكواب مرق دجاج للشوربة .طبعا مرق دجاج يعني مرق دجاج موب ماجي !
بصلتين كبار مقطعة
فصين ثوم مقطعة شرايح
عودين كرفس مقطعة صغار
حوالي ٧٠٠ – ١٠٠٠ جرام فطر طاااااازج !!! ما ينفع أبدا أبدا أبدا هنا المعلب .. مقطع شرايح
٣ملاعق زبدة
ملعقة زيت زيتون
ملعقتين كبار طحين
ملعقة كبيرة خل بلسمك أو شيري
١/٢كوب ساور كريم
١/٢كوب قشطة خفق
أول شي نطبخ الشعير في قدر صغير مع المرق حقه مع ربع ملعقة ملح على غلية خفيفة
حوالي نص ساعة أو إلين يلين.بعدين ذوبي الزبدة و الزيت في قدر وعلى حرارة وسط
أطبخي البصل و الكرفس إلين يذبل بعدين حطي الفطر و الملح والفلفل وعلي الحرارة
إلين أعلى شي عشان تلونين الفطر مع التحريك المستمر راح تاخذ شوي وقت العملية هذي
بعدين نزلي الحرارة مرة ثانيه للوسط وحطي الثوم و أطبخيه شوي بس،
بعدين حطي الخل + كوب مويه وحركي زيييييين مع مسح قاع القدر
عشان تذوبين كل القطع البنية اللي بتعطي الشوربة نكهتها .بعد ما يختفي السائل
رشي الطحين عليها وحركي زين حوالي دقيقة هذا اللي راح يثقل الشوربة .
الحين أضيفي المرق وخليها تغلي على غلية جدا خفيفة حوالي ربع ساعة.
الحين أضيفي الشعير المطبوخ و حركيه شوي و بعدين أضيفي الساور كريم و القشطة
وخليها تطبخ بس لا تخلينها تغلي أبدا !!! أو فيه إحتمال تفصل القشطة يعني أنتبهي .
آخر شي ذوقي الشوربة و تأكدي من الملح والفلفل. لو تبين أطعم بعد حطي فطر مجفف
لو لقيتيه راح يعطي نكهة فطر قوية.
————————————————————————————————————————————————————————–
شوربة الشمر والجزر .. Carrot and fennel soup

جدا سهلة ومن أطعم الشوربات اللي ذقتها ، لا تنسين طعم الشوربة يتحسن
كل ما كان المرق أطعم وكل ما كانت المكونات طازه
حبتين شمر القلب بس ، مقطعة شرايح ١/٤ إنش تقريبا .
نص كيلو جزر مقطع حلقات نفس الحجم
بصله كبيرة مقطعة أجنحة بعد نفس الحجم
٣فصوص ثوم
تقريبا ٥ ملاعق زيت زيتون
١/٢ملعقة سكر
٤أكواب مرق دجاج
ملعقة صغيرة من بذور الشمر
سخني الفرن على ٤٥٠ . بعدين حطي الخضار ورشيها بشوي زيت زيتون وملح وفلفل و سكر في صينية فرن كبيرة،وحطيها في رف الفرن الأسفل وخليها تتحمر إلين تبدأ تلون شوي حوالي ٢٥ – ٣٠ دقيقة وطبعا حركيها بعد نص الوقت عشان تستوي من تحت بعدين حطي الخضار المحمرة في قدر كبير مع المرق وخليها تطبخ حوالي ٢٥ دقيقة بعدين أطحني الشوربة . رجعيها على النار و عدلي الطعم لو تبين بالملح و الفلفل أو لو تبين زيدي مرق عشان تخففينها أو خليها شوي تطبخ عشان تثقلينها .
————————————————————————————————————————————————————————–
كيش الفطر و السبانخ .. Spinach and Mushroom Quich
أول شي تسوين العجينة :
كوب ونص طحين
ملعقة صغيرة ملح
ملعقة صغيرة سكر
أصبع زبدة مقطع مكعبات حجمها حوالي ١ سم
بيضة
ملعقة صغيرة مويه باردة
بياض بيضة
حطي الطحين و الملح و السكر في خلاط مولينكس ، بعدين حطي الزبدة الباردة و أخلطي شوي إلين يسويلك تكتلات .
بعدين حطي البيضة و المويه بعد ماتخلطينهم مع بعض .
الحين أبدي أعجني العجينة شوي بس !!!! يعني ٤ مرات لاأكثر بس عشان تخلطينها
موب عجن عجن زي الخبز . غلفيها بنايلون ورجعيها الثلاجة ساعةعلى الأقل .
الحين أفردي العجينة ورصيها في صينية التارت ( تكفي العجينة هذي تارت حجمها ١٢ إنش )
بعدين رجعيها الثلاجة ساعة ثانية .
الحين سخني الفرن على ٤٠٠ بعدين سووي زي ما سويت في موضوع التارت
حطي قصدير أو ورق زبدة و أملي العجينة بوزن مثل رز أو حبوب أو أي شي ثاني .
بعدين أطبخيها في الفرن ٢٠ دقيقة . بعدين شيلي الوزن و القصدير و خرميها بشوكة
و كملي طبخ تقريبا ١٠ دقايق أو إلين تبدأ تسير بنية.
الحين أدهني التارت ببياض البيض طبقة جدا خفيفة ، هذي عشان تمنع الرطوبة تتسرب للعجينة.
الحين الحشوة :
ملعقة كبيرة ونص زبدة .
١/٣كوب بصل ذاك الفرنسي مدري لو تعرفينه يجي صغير و أحمر ، مقطع بس لو ما عندك ينفع بصل عادي .
١/٤كيلو فطر طازج لو سمحتي مقطع شرايح نحيفة
زعتر بري
٣/٤كوب قشطة خفق
بيضتين
رشة ملح
رشة فلفل
بصلتين خضر مقطعة صغار
نص كوب سبانخ .
ملعقتين جبنة جريير .. Gruyere
الحين ذوبي الزبدة بعدين أطبخي البصل إلين يذبل بعدين حطي الفطر و الملح و الفلفل
وأرفعي الحرارة على أعلى شي ،أطبخي الفطر إلين يبدأ يلون وينطبخ حوالي ٨ دقايق
بعدين نزلي الحرارة و حطي السبانخ وقلبيها . بعدين شيلي الخليط من المقلة على صحن إلين يبرد.
الحين سخني الفرن على ٣٥٠ بعدين حطي الزعتر البري في قاعدة التارت
وبعدين الفطر و السبانخ،بعدين أخلطي القشطة مع البيض وملح وفلفل وصبيها على التارت
بعدين رشي فوقها الجبن والبصل الأخضر.
حطيها في الفرن إلين ما يجمد الكسترد حوالي ٢٥ دقيقة ، بعدين خليها ترتاح ربع ساعة قبل تاكلينها
————————————————————————————————————————————————————————–
سلطه خضار مشويه مع صوص زيتون .. Grilled Vegetable Salad

أول شي الصوص :
فصين ثوم
ملعقة كبيره كابر
كوب زيتون بدون نوى
١/٢ ملعقة صغيره سكر
١/٢ ملعقة صغيره فلفل حار مجروش
ملعقتين كبار خل عنب أحمر
١/٢ كوب زيت زيتون
حطي المكونات كلها في خلاط مولينكس وأخلطيهم إلين يتقطعون شوي بس يكونون لسا خشنين تقريبا .
هذا الصوص موب بس لهذي السلطه هذا يسمونه أوليفادا صوص يوناني مشهور قدميه مع أشياء كثير ينفع .
للسلطة :
راس بروكلي مقطع على شكل زهرات
راس زهره ( أو راسين بروكلي لو تبين ) مقطع على شكل زهرات
حبه بصل أحمر مقطعه أجنحه عريضه
حبتين فلفل مشكل أحمر ، أصف، أخضر .. اللي تبين
ملح وفلفل وزيت زيتون
رشي الخضار بشوي زيت زيتون وبعدين شوي بس ملح وفلفل .
شغلي شوايه الفرن من فوق على أحر شي وحطي الخضار في صينيه فرن ودخليها الفرن إلين تبدأ تنشوي من الأطراف بس . بعدين طلعيها وأخلطيها مع الصوص
————————————————————————————————————————————————————————–
جوانح الدجاج الحاره .. Chicken wings

هذي الحاره :
تفضلي :
تاخذين أول شي أجنحة دجاج وتشيلين الطرف الأخير . بعدين تقسمين الجناح نصين . الحين حطي جيبي كوب طحين وحطي معهم ملعقة صغيرة بابريكا ، ملعقة صغيره بوردة ثوم ، ملعقة صغيره فلفل حار ، ملعقة صغيره فلفل أسود ، ونص ملعقة صغيره ملح وحركي البهارات مع الطحين . رشي الطحين على الأجنحة وغطيها فيه بعدين حطيهم في الثلاجه على الأقل ساعتين عشان تتبل وعشان تلصق التغطيه فيه .
الحين أقلي أجنحة الدجاج في زيت حار إلين تستوي من الداخل . بعدين سويي التغطيه اللي هي عباره عن ١/٤ أصبع زبده مع ١/٢ كوب شطة من نوعية frank’s أو لو مرررررره مالقيتيها أستخدمي شطة كرستال عادية مع شوي تباسكو ، ذوبي الزبده وحطي الشطة بعدين أول ما ينخلطون صبيهم على الأجنحة قبل التقديم وقدميها مع صوص الرانش. .
————————————————————————————————————————————————————————–
منتو ربيان .. Shrimp dumplings
بالنسبة للعجينة للأسف طلع ضروري نشا القمح ( غير نشا الذرة ) .. مدري إذا تقدرين تلاقينه أو لأ ؟ بس هو اللي يخليه شفاف زي ما شفتي ..
جربي تسوينها ب wonton wrappers أعتقد شفتها في السوبرماركت مره ، قريبه منها .
الحشوة :
بياض بيضه
ملعقة كبيره صويا خفيفة
ملعقة صغيرة سكر
ملعقة صغيرة نشا
١/٢ ملعقة صغيرة زيت سمسم
ملعقة صغيرة ملح
١/٢ ملعقة صغيرة فلفل أبيض
٢٢٥ جرام ربيان منظف ومقشر
ملعقة كبيره زيت
١/٤ كوب بامبو شووت bamboo shoot تلاقينه معلب في السوبرماركت
أخلطي المكونات مع بعض وخليها في الثلاجه ساعتين بعدين لفيها في الورق حق اللف و أطبخيها بالبخار زي المنتو إلين تقلب الحشوة برتقالية .
————————————————————————————————————————————————————————–
سلطة بطاطس مع الأعشاب .. Potato and herb salad

كيلو ونص بطاطس حمراء ( لو ماعندك أستخدمي بطاطس عاديه بس الحمراء حلوه كونها تحافظ على شكلها ما تنهرس مع الطبخ )
٣ ملاعق كبيره خل رز .. متوفر في السوبرماركت .. لو ماعندك أستخدمي ملعقتين خل تفاح
٣/٤ كوب مايونيز
٣ بصلات خضراء مقطعه صغار
عود كرفس مقطع شرايح نحيفة
١/٤ كوب بقدونس مفروم
١/٤ كوب ريحان أو نعناع مفروم
ملعقتين كبار شبت مفروم
ملعقة صغيره بشر ليمون
ملح وفلفل
حطي البطاطس في مويه بارده وخليها تغلي بعدين نزلي الحراره إلين تصير على غليه جدا خفيفه . خليها تطبخ إلين تصير لينه إذا دخلتي سكين تدخل بسهوله للأخير . طلعيها من المويه وصفيها وخليها تبرد إلين تصير سهل تمسكينها بس لا تخلينها تبرد تماما !!
قشريها لو تبين . وبعدين قطعيها مكعبات . أخلطي المكونات كلها وذوقي وأنتي تحطين الملح و افلفل . السلطه هذي ممكن تتسوى اليوم اللي قبله وتنحط في الثلاجه
————————————————————————————————————————————————————————–
هذي طريقة فوندوتا إيطاليه غير شوي عن الفوندو بس هي أسهل و أصعب تفصل زي الفوندو العادي .. Italian fondotta
٤٠٠ جرام جبن مقطع مكعبات
كوب حليب كامل الدسم
٣ صفارات بيض
فص ثوم
ملح
لو عندك زيت فقع بيكون رهيب هنا
أنقعي الجبن في الحليب ساعتين عالأقل إلين يصير لين مره . صفي الحليب من الجبن .
الحين في حمام مائي كأنك تذوبين شكولاته ، حطي الحليب و البيض مع التحريك بإستمرار تقريبا ٣ – ٤ دقايق إلين يثقل شوي . بعد ما يثل حطي الجبن على دفعات شوي شوي إلين يذوب بنعومه . أطبخي الخليب زود ٥ دقايق تقريبا بعدين ذوقيه وعدلي الملح . لا تخلين الخليط يغلي !! أنتبهي من هذي النقطة عشان ما يتكتل وعشان ما يفصل عليك .
وهو يذوب جهزي صحن الفوندو بإنك تدهنينه بصل الثوم عشان تعطيمه طعم ثوم خفيف مره بعدين صبي الجبن في الصحن حق الفوندو وقدميه مع أي شي تحبين .. قطع خبز فرنسي مثلا ، أي خضار زي البروكلي أو الجزر أو الزهرة ، بطاطس محمرة في الفرن أو حتى مسلوقه ، فطر سوتيه أو محمر في الفرن ، دجاج ، لحم … الخيارات أحس كثيره …
————————————————————————————————————————————————————————–
ديب سبانخ للشيبس مثلا .. Spinach dip
١١٠ جرام تقريبا جبن فيلادلفيا على حرارة الغرفة
علبة خرشوف معلب مقطعه صغاااار
فص ثوم مفروم
١/٢ كوب بارمزان
ربع كوب سبانخ مقطع
١/٢ كوب ساور كريم
١/٢ كوب مايونيز
سخني الفرن على ٣٥٠ ..
أخلطي كل المواد مع بعض وحطيها في صحن يدخل فرن وحطيه في الفرن تقريبا نص ساعة أو إلين الطبقة اللي فوق تبدأ تتحمر.
————————————————————————————————————————————————————————–
وصفة دجاج مشوح مع بهارات كيجون .. Cajun chicken

سويي التتبيلة الجافة أول :
٣ملاعق كبيره فلفل حار مطحون ، ملعقتين كبار سكر بني ، ملعقتين كبار بابريكا ( يفضل مدخنة لو عندك ) ، ملعقة كبيره كمون مطحون ، ملعقة صغيرة بودرة ثوم ، ملعقة صغيرة أوريجانو .. أخلطيهم مع بعض بصحن ..
الحين جيبي صدور دجاج ونشفيها زييييين بعدين رشي على الوجهين ملح وفلفل أسود وبعدين حطي عليها خلطة البهارات و أضغطي عليها شوي بيدك عشان تلصق ..
سخني مقلة ( يفضل ستانلس ) على حراره أعلى من وسط بشوي و حطي شوي زيت و بعدين شوحي الدجاج إلين يتحمر الوجه الأول . نزلي الحراره بحيث البهارات ما تنحرق بعدين أطبخي الوجه الثاني . بعد ما يستوي الدجاج من داخل ( يروح اللون الوردي ) شيلي الدجاج من النار علطول وخليه يرتاح دقيقتين قبل تاكلينه .
الدجاج رهيب لأكثر من شي موب بس لحاله تقدرين تسوينه برجر دجاج رهيب أو حتى تقطعينه ساندوتشات .
————————————————————————————————————————————————————————–
الرز البخاري ..
السر فيه في الجزر و الدهن دايما يكون دهنه أكثر من الرز العادي . الزيت ينفع كدهن بس دايما حطي دهن من تحمير الدجاج أو اللحم مثلا مع الرز هذا راح يسوي كل الفرق .
عموما هو السر في المكونات و الطريقة أكثر من إنه في البهارات زي ماناس كثير يسوون ….
قطعي بصلة و فص ثوم و أبشري حبة جزر كبيرة .
أطبخي البصل في زيت نباتي إلين يبدأ يتلون من الأطراف شوي بعدين حطي الثوم و الجزر و البهارات ( شوي قرنفل ، زنجبيل ، قرفة ، هيل ، فلفل حار ، حبوب كمون ) أطبخيهم بعد ما تقصرين الحرارة إلين يذبل الجزر . الحين حطي معجون طماط ( حوالي ملعقة كبيرة ) بعدين حركيه معهم شوي . الحين حطي الرز ( الوصفة هذي لكوب رز بس ) و أطبخيه شوي إلين يبدأ يتقمر شوي بعدين حطي المرق ( نوعية المرق هي كل شي هنا أستخدمي مرق لذيذ وطعمه قوي ) و الملح ( ملعقة صغيرة ) و حطي معهم لو تبين شوي من دهن الدجاج أو اللحم اللي يتحمر . أول ما يبدأ يغلي نزلي الحرارة على أقلللل شي وغطي القدر زيييييييييين وخليه يطبخ إلين يستوي الرز . بعد ما يتسوي خلي القدر مغطي وخليه يرتاح بدون نار ٥ دقايق – نص ساعة على الأقل وبعدين قدميه مع الكشنة عالوجه .
لو تلاحظين ما قلت لك حطي لحم أو دجاج لأني شخصيا أسوي الدجاج أو اللحم في الفرن و أستخدم مرق أنا أكون مسويه من أول … بس لو تبين أستخدمي مويه عاديه و أستخدمي دجاج أو لحم عادي زي باقي الوصفات بعدين كبي الرز آخر شي بعد ما تشيلين الدجاج أو اللحم .
————————————————————————————————————————————————————————–
الباييا .. Paella

السيفوود ..
دجاجة مقطعه ١٢ قطعه .. يعني تقطعينها رجل ، الفخذ تقسمينه ، الصدر تقسمينه بالنص ، و جناح .
ملح وفلفل
ملعقة صغيرة أوريجانو مجفف
زيت زيتون
فصين ثوم
١/٢ بصله كبيره مقطعه صغار
حبتين طماط معلب منزوعة البذور و مقطعه
ملعقة صغيرة بابريكا حلوه أو مدخنة أو في أسوأ الحالات حاره
كوبين رز بدون غسل !
ملعقتين صغار خيوط زعفران
٦ أكواب مرق دجاج
ذيلين لوبستر مقسومة بالنص
نص كيلو كلماري مقطع حلقات
نص كيلو ربيان كبار منظف
١٢ حبة مسل mussels
١/٢ كوب بازلاء مجمده مذوبه
ليمون
الحين الباييا الناجحة لازم يكون عليها طبقة رز تقرمش من تحت (حكاكة) عشان كذا أستخدمي أعرض أعرض قدر عندك و أعلى أعرض عين غاز بعد .
نشفي الدجاج زين بمنديل رول . بعدين رشي عليه ملح وفلفل و أوريجانو . سخني المقلة على حرارة وسط وبعد ما تحتر حطي زيت زيتون و أطبخي الدجاج إلين تحمرين الوجه الأول بعدين أقلبيه وحمري الوجه الثاني ، نزلي الحرارة وكملي طبخ إلين تقريبا يستوي الدجاج من داخل . الحين شيلي الدجاج عالجنب وكبي الزيت بس لا تنظفين المقله !
رجعي المقلة على حرارة وسط وحطي شوي زيت زيتون مع البصل ورشة ملح و أطبخيه إلين يذبل بعدين حطي الثوم و الطماط و أطبخيه إلين يبدأ البصل شوي يتكرمل بعدين حطي البابريكا وكملي طبخ.
حطي الرز عالخليط وقلبيه مع الدهن و أطبخيه شوي عشان تحمصينه شوي .حطي الزعفران في ربع كوب مويه حاره وخليه ٥ دقايق بعدين كبيه عالرز مع المرق . خلي المرق يطبخ على غليه جدددددددددا خفيفه بدون ما تغطين القدر أو تحركين الرز حوالي ١٠ دقايق.الحين حطي السيفود مع الدجاج اللي طبخنا وخليه يطبخ مع الرز على غليه جدا خفيفه إلين يصير الرز ألدنتي و يفتح المسل. الحين حطي البازلاء وخليها تطبخ إلين يتشرب الرز كل المويه . طفي النار وخليها ترتاح ٥ دقايق قبل تاكلينها .

————————————————————————————————————————————————————————–
كول سلو .. col slow

١/٢ راس ملفوف أخضر مقطع شرايح نحييييييفه
١/٢ راس ملفوف أحمر مقطع بعد شرايح نحيفة
جزرة مقطعه بعد شرايح نحيفه
١/٢ كوب لبن مراعي أو غيره
٤ ملاعق كبيره زبادي
٤ ملاعق كبيره مايونيز
ملعقة كبيره من المويه حقت ال
ملعقة صغيره خردل بودره
ملعقة كبيره كراث مقطع
ملح وفلفل أسود
ولو تبين بعد زيدي عليهم بودرة كرفس
أخلطيهم مع بعض وخلاص …. لو تبين يمديك تبشرين الخضار هنا أو حتى لو تبينها أنعم وأنعم بعد أفرميها بالخلاط المولينكس فيه ناس يحبونها كذا بس لاتخلينها تصير سايل يعني بس قطع صغيره هذا بيخليها زي حقت كنتاكي لو تحبينها .
————————————————————————————————————————————————————————–
بارميجانا الباذنجان .. Eggplant Parmigana
أول شي تسوينه هو إنك تقطعين الباذنجان بالطول بحيث يكون عندك شرايح عريضة شوي تقريبا زي الستيك. الحين رشي عليها ملح وفلفل بعدين غطسيها في طحين بعدين بيض بعدين بقسماط مخلوط معه جبن بارمزان .
سخني شوي زيت زيتون و أقلبي الباذنجان إلين يتحمر الوجهين بعدين حطيه على ورق نشاف ..
الحين سويي صوص الطماط الأساسي ( إذا ما عندك الطريقة بنزلها قريب إن شاء الله أو دوريها في موضوع الباستا) بعدين حطي شوي صوص على صينية بعدين الباذنجان بعدين شوي صوص فوق الباذنجان بعدين موزاريلا و شوي بارمزان ودخليها فرن ٣٧٥ إلين تذوب الجبنة وتبدأ تتحمر .
————————————————————————————————————————————————————————–
باذنجان .. Pickled Eggplant
قطعي الباذنجان عيدان زي البطاطس تقريبا بعدين رشي عليها ملح وقلبيها فيه وحطيها في صفاية بلاستك. خليه نص ساعة عشان الملح يشرب الرطوبة الزايدة و المراره من الباذنجان ( لو كان الباذنجان اللي عندك صغير ما يحتاج ) .
الحين أشطفي الباذنجان بالمويه عشان تشيلين الملح الزايد بعدين حطيه بين منديلين رول وخليه يجف زيييين. الحين سويي سائل التخليل بإنك تخلطين جزأ خل مع جزئين موية يعني لو أستخدمتي كوب خل حطي كوبين مويه. نوعية الخل راجعتلك بس يفضل تستخدمين خل عنب أو تفاح وبعدي عن الخل الأبيض ماله طعم. أغلي سائل التخليل مع ورق غار وشوي فلفل أسود كامل و شوي كزبرة وكمون كاملة بعدين حطي الباذنجان و أطبخيه ٣ دقايق تقريبا. حطي فصوص ثوم في مرطبان نظيف بعدين حطي عليها شوي زيت زيتون بعدين حطي الباذنجان فوقها وبعدين سائل التخليل إلين يوصل لأعلى شي. قفلي المرطبان وخليه على حرارة الغرفة إلين يبرد بعدين حطيه في الثلاجه عالأقل أسبوع يتخلل. كليه في خلال ٣ أسابيع تقريبا .
————————————————————————————————————————————————————————–
ربيان أو دجاج أو لحم بالكاجو .. Chicken Cashew
الصوص :
1/2 كوب مرق دجاج
ملعقتين صغار نشا
1/4 كوب صوص هويسان
ملعقتين كبار صويا
ملعقة صغيرة زيت سمسم .
أخلطي المقادير مع بعض وخليها عالجنب .
للطبخة :
كوب كاجو غير مملح
ملعقتين كبار زنجبيل مفروم
فصين ثوم مقطعه
3 أكواب خضار مشكلة حسب الرغبة
تقريبا 350 جرام ربيان مقشر ومنظف
سخني مقلة كبيره على حرارة عاليه ، حطي شوي زيت و أقلي الكاجو مع الثوم و الزنجبيل إلين تطلع ريحتهم تقريبا 30 ثانية . حطي الخضار و أقلبيهم شوي بعدين حطي شوي مويه وغطي القدر . خليه يطبخ إلين الخضار تصير مستويه بس لسا تقرمش شوي تقريبا 3 دقاق . حطي الربيان و الصوص وخليهم يطبخون إلين يقلب الربيان برتقالي ويثقل الصوص شوي . بس …
————————————————————————————————————————————————————————–
شوربة الذرة الصينية .. Corn Soup
٣ أكواب مرق دجاج
علبة ذرة حجمها ٢٥٠ جم اللي يكون مكتوب عليها كريمد creamed corn تلاقينها في السوبرماركت.
علبة ذرة كاملة
كوب دجاج مطبوخ ومقطع
ملعقة كبيره نشا
ملعقتين كبار مويه
بياض بيضتين
بصل أخضر
حطي المرق و الذرة المطحونه و الذرة الكاملة و الدجاج في قدر و خليهم يطبخون على غلية خفيفه . أخلطي النشا و المويه مع بعض بعدين صبيهم على الشوربة و خليهم يطبخون إلين تثقل ويروح طعم النشا . ذوقي الشوربة وعدلي الملح و الفلفل (فلفل أبيض) و السكر لو أحتاجت. أخفقي بياض البيض شوي بعدين حطيه عالشوربة و أطبخيها إلين تبدأ تطلع زي الرغوة عالشوربة .. وبس
————————————————————————————————————————————————————————–
جينيرال تسو .. General tso chicken (Kendo chicken)
الصوص :
ملعقة صغيرة زيت سمسم
٤ ملاعق صغيرة نشا
٤ ملاعق صغيرة سكر
٥ ملاعق صغيرة خل رز
٦ ملاعق كبار صويا خفيفه
١/٢ كوب مويه
للدجاج :
نص كيلو صدور دجاج
بيضه
ملعقة كبيره نشا
باقي الأغراض
فلفل حار أحمر حسب الرغبة
ملعقة كبيره زنجبيل
٣ فصوص ثوم مقطعه صغار
٤ حبات بصل أخضر
سمسم
————
أخلطي مقادير الصوص وحطيها على جنب …
الحين أخلطي النشا مع البيضه و قلبي الدجاج فيهم .
سخني الزيت و أقلي الدجاج إلين يصير يقرمش من برا ..
طلعي الدجاج وحطيه على ورق عشان يشرب الدهن … وكبي أغلب الزيت وبقي بس شوي عشان نطبخ الفلفل و الزنجبيل و الثوم ..
الحين أطبخي الزنجبيل و الثوم و الفلل إلين تطلع ريحتهم شوي بعدين شيليهم لو ما تبين طعمها قوي …
رجعي الدجاج و صبي الصوص عليه و أطبخيه معه شوي بعدين طفي النار و رشي حلقات البصل الأخضر و السمسم .
————————————————————————————————————————————————————————–
شوربة ربيان أو الأستكوزا ( بيسك ) .. Shrimp or Lobster Bisque
هذي جدا لذييييييييذة وهي تمشي بأي نوع قشريات ربيان ، كراب ، ستاكوزا أو حتى خليط منهم .
هذي طريقة بسك ربيان .
٣/٤ كيلو ربيان غير مطبوخ ومقشر .. طبعا القشر ماترمينه !! خليه راح نسوي منه مرق ربيان هنا .
أصبع زبده
زيت زيتون
حبتين كراث هندي .. يختلف عن الكراث العادي كثيييير عموما تلاقينه في كل سوبرماركت يجي طويل وعريييييض . نستخدم الجزأ الأبيض منه بس . نقطع الجزأ الآخضر ونرميه . بعدين الجزأ الأبيض نقطعه بالطول ونغسله زييييين بعدين نقطعه شرايح .
٣ حبات كرفس مقطعه حلقات
٢ حبة جزر مقطعه نفس الكرفس
ورقة غار
قشر نص برتقاله .. القشر نبيه قطعه كبيره لا يكون مفروم ناعم مره
ملعقتين كبار معجون طماط
ملعقة كبيره خل عنب + ١/٤ كوب مويه
٣ ملعقت كبيره طحين
٤ أكواب قشطة خفق
ملح وفلفل
كراث عادي للزينة مع عصير ليمون
نسخن ٣ ملعقت زيت زيتون بعدين نذوب الزبده معها على حرارة وسط .. نحط عليهم قشر الربيان بس القشر !! و الكراث و الكرفس و الجزر ومعجون الطماط وورق الغار و قشر البرتقال ونطبخهم إلين تلين الخضار شوي حوالي ١٠ دقايق . الحين نصب عليهم الخل مع المويه ونحرك زييييييين إلين يتبخر كل المويه . الحين نحط الطحين ونحركه حوالي دقيقتين. الحين نحط المويه ونخليها تطبخ على غليه خفيفه حوالي ٢٠ دقيقه .. نحط القشطة ونتأكد إن الحرارة ما تزيد عن غلية جددددا خفيفه ونخلي الشوربة تطبخ زياده ٢٠ دقيقه . نصفي الشوربة في قدر ثاني ونذوق الملح و الفلفل . الحين نرجع الشوربه لغليه خفيفه بعين نحط الربيان بعد ما نقطعه قطع كبيره لو كان كبير مره نخليه يطبخ حوالي دقيقتين أو إلين ما يقلب لونه برتقالي .. ( لا تخلين الربيان يطبخ أكثر من كذا عشان ما يصير قاسي ) .. قدمي الشوربه مع الليمون و الكراث عالوجه .
أوكي الشوربة وعرفتها هذي إسمها بيسك .. هي نوع من الشوربات البحرية الثقيلة بس بعد اللذييييييييييييييذه … الشوربه الثانيه ماعرفتها والله .. و الربيان بعد ماعرفته لا هو و لا الصوص .. هذي طريقة بيسك ربيان رهييييييييييييييييبة وإنشاء الله أحسن من حقت المطعم بعد لأني ذقت كثير في مطاعم بس هذي كانت شوي غير … ٣/٤ كيلو ربيان غير مطبوخ ومقشر .. طبعا القشر ماترمينه !! خليه راح نسوي منه مرق ربيان هنا . أصبع زبده زيت زيتون حبتين كراث هندي .. يختلف عن الكراث العادي كثيييير عموما تلاقينه في كل سوبرماركت يجي طويل وعريييييض . نستخدم الجزأ الأبيض منه بس . نقطع الجزأ الآخضر ونرميه . بعدين الجزأ الأبيض نقطعه بالطول ونغسله زييييين بعدين نقطعه شرايح . ٣ حبات كرفس مقطعه حلقات ٢ حبة جزر مقطعه نفس الكرفس ورقة غار قشر نص برتقاله .. القشر نبيه قطعه كبيره لا يكون مفروم ناعم مره ملعقتين كبار معجون طماط ملعقة كبيره خل عنب + ١/٤ كوب مويه ٣ ملعقت كبيره طحين ٤ أكواب قشطة خفق ملح وفلفل كراث عادي للزينة مع عصير ليمون نسخن ٣ ملعقت زيت زيتون بعدين نذوب الزبده معها على حرارة وسط .. نحط عليهم قشر الربيان بس القشر !! و الكراث و الكرفس و الجزر ومعجون الطماط وورق الغار و قشر البرتقال ونطبخهم إلين تلين الخضار شوي حوالي ١٠ دقايق . الحين نصب عليهم الخل مع المويه ونحرك زييييييين إلين يتبخر كل المويه . الحين نحط الطحين ونحركه حوالي دقيقتين. الحين نحط المويه ونخليها تطبخ على غليه خفيفه حوالي ٢٠ دقيقه .. نحط القشطة ونتأكد إن الحرارة ما تزيد عن غلية جددددا خفيفه ونخلي الشوربة تطبخ زياده ٢٠ دقيقه . نصفي الشوربة في قدر ثاني ونذوق الملح و الفلفل . الحين نرجع الشوربه لغليه خفيفه بعين نحط الربيان بعد ما نقطعه قطع كبيره لو كان كبير مره نخليه يطبخ حوالي دقيقتين أو إلين ما يقلب لونه برتقالي .. ( لا تخلين الربيان يطبخ أكثر من كذا عشان ما يصير قاسي ) .. قدمي الشوربه مع الليمون و الكراث عالوجه

» المقبلات و الأطباق الرئيسية .. Mains and Entrees 2
» المقبلات و الأطباق الرئيسية .. Mains and Entrees 3
» المقبلات و الأطباق الرئيسية .. Mains and Entrees 4
» المقبلات و الأطباق الرئيسية .. Mains and Entrees 5
» المقبلات و الأطباق الرئيسية .. Mains and Entrees 6