االمجنات، الفطور و الحلويات .. Desserts and Breakfast
البان كيك .. Pancakes
كوبين طحين متعدد الإستخدامات منخولة
ملعقتين كبار بيكنج باودر
ملعقتين كبار سكر
١/٢ملعقة شاهي ملح
كوبين لبن(صدقيني هذا للي يسوي كل الفرق)
بيضتين
ملعقتين كبار زبدة أو زيت
أول شي إنخلي المواد الجامدة مع بعض .أخلطي المواد السايلة في صحن.بعدين في صحن خلط حطي المواد الجامدة في جهة من الصحن و حطي الموادالسايلة في الجهة الثانيةبعدين إبدي إخلطي إلين ما تلاقينها تقريبا إنخلطت . لاحظي إني قلت تقريبا إنخلطت زي ما أقول كل مرة لا تخلطينها كثير عشان ما تسير ناشفة ، إخلطيها شوي شوي إلين ما كل الطحين يختفي تقريبا يعني عادي تلاقين كتل طحين لاتحطين حيلك فيها هذي بتختفي في الخطوة اللي بعدها .
الحين خلي الخليط يرتاح شوي ٥ دقايق.
بعد ٥ دقايق بتلاقين الخليط صار شكله غريب
الحين سخني الصاج لو عندك أو مقلة عادية على حرارة وسط
و بعد ما تحتر إدهنيها بشوي زيت .الحين بمغرفة صبي حوالي مغرفة من الخليط على المقلة في مكان واحد ( عشان تجيك دائرية )
و إنتظري إلين تطلع فقاعات للسطح بعدين إقلبيها.
ملاحظة : إنتبهي لا تخلطين الخليط كثير بعد مايرتاح مهم جدا إن الهوا اللي جوا يبقى جوا.
البانكيك ياخذ حوالي ٣ – ٥دقايق عشان يستوي . قدميها مع شيرة البانكيك ( طبعا النوع الأصلي ) و زبدة .
لو تحبين قدميها بعد مع موز و بيكان محمص أو لوز عادي بعد ينفع .
————————————————————————————————————————————————————————–
الباوند كيك .. Pound Cake
كوبين طحين منخول
١/٢ملعقة صغيرة بيكنج باودر
رشة ملح
أصبعين زبدة دافيه بس موب ذايبة
كوب ونص سكر
٣بيضات على حرارة الغرفة
بشر ليمون
رشة فانيلا
١/٢كوب حليب على حرارة الغرفة
** طبعا كل شي بالأكواب المعيارية !
سخني الفرن على ٣٥٠ من تحت .
أدهني صينية كيك حقت الباوند كي العادية اللي تجي مستطيلة بزبدة و رشيها بطحين وشيلي الطحين الزايد.
أخفقي الزبدة والسكر إلين يصير كريمي حوالي ٥ دقايق بالخلاط اليدوي أو ٣ بالخلاطات الكبيرة . بعدين أضيفي البيض وحده وحده بعدين قشر الليمون و الفانيلا . بعدين نزلي السرعة وأضيفي الطحين و الحليب بالتدرج وعلى دفعات متتالية ..
إن شاء الله فهمتي .. يعني قصدي تحطين دفعة طحين بعدين شوي حليب بعدين طحين بعدين حليب وكذا حوالي ثلاث دفعات بالكثير و أهم شي تبدأين وتنتهين بطحين… و طبعا بدون ما أقولك لا تزودين خلط أبداأبدا ..
صبي الخليط في الصينية بعدين أخبزيها في الفرن إلين يطلع عود منها شبه نظيف يعني مع شوي فتات كيك حوالي ساعة إلى ساعة وربع .
خليها تبرد على شبك بعدين أقلبيها وخليها تكمل تبرد.
وبس هذي الباوند كيك.
————————————————————————————————————————————————————————–
التراميسو .. Tiramisu
حوالي كوب إسبريسو مخففة بكوب مويه ،
أنا لأني أمووووت في شي إسمه إسبريسو أسويها بكوبين بس أنتي ورغبتك عاد
مخلوط معاها ملعقة كبيرة سكر .
١/٢كوب سكر
4صفارات بيض
نص كيلو جبن ماسكاربوني
كوب قشطة خفق باااااااااااااارد
حوالي ٣٦ حبة أصابع السيدة أو الليدي فينجر
قشر برتقال أو فانيلا أو حتى شوي إسبريسو ( إختياري)
أول شي في حمام مائي أخفقي البيض و السكر بخلاط يدوي أو باليد إلين ما يتضاعف حجمه حوالي ٣ مرات (حوالي ٥ – ٨ دقايق). لو تبين حطي النكهات اللي تبين الحين ، إستخدمي فانيلا أوبرتقال لو تحبين بس أنا زي ماقلت أعشق القهوة عشان كذا أستخدم يمكن شوت إسبريسو مع البيض و السكر.بعدين شيليها من الحمام و أخلطي معاها المسكربوني. الحين في صحن معدني نظيف وبارد ومضرب خلاط بعد نظيييييييف أخفقي القشطة إلين ما تثبت وتوصل مرحلة منقار الطير. الحين أخلطي الإثنين مع بعض شوي شوي. الحين جيبي صينية قزاز أو عاد أي شي أنتي وفنك في التزيين تبين أكواب، تبين صينية وحده كبيرة اللي تبين . أنا أستخدم صينية بايركس كبيرة و منها أستخدم قالب دائري و أقطعها على شكل دوائر قبل التقديم يطلع شكلها خرااااافي ، بس زي ماقلت أنتي وفنك. غطسي البسكوت في الإسبريسو غمسه سريييييييعة ،راح تشرب القهوة بسرعة وتتفتت
فأنتبهي إنك تغمسنها كثير.رصيها في الصينية بعدين صبي فوقها نص الخلطة بعدين باقي البسكوت و باقي الخلطة فوقها . رشي فوقها شكولاته بودرة للتزيين وطبعا ما يحتاج أقولك زينيها على كيفك . حطيها في الثلاجة ٦ ساعات على الأقل ، تقعد في الثلاجة إلى يومين . هذي طريقة تقليدية جدا .لو تبين تعديل حلو قد سويته صدقيني جربيه مرة راح يعجبك .
أخلطي مع الزابيوني شكولاته بيضاء جدا لذيذة مع القهوة.
————————————————————————————————————————————————————————–
الكريب .. Crepe
بيضتين
٣/٤ كوب حليب
١/٢كوب مويه
كوب طحين
٣ملاعق زبدة سايحة
ملعقتين سكر
رشة ملح
في خلاط أخلطي المواد مع بعض بسسسسس إنتبهي لا تعلقين على الزر لأ إضغطي ضغطة ووقفي وبعدين الضغطة اللي بعدها ١٠ ضغطات لا أكثر …راح تلاقين كتل طحين !! ماعليك منها بتروح . الطحين ياخذ وقت عشان يشرب المويه. حطي الخليط في الثلاجة على الأقل ساعة إلي ٤٨ ساعة . الحين سخني مقلة و بعد ما تحتر أدهنيها بزبدة و حطي شوي من الخليط يكفي إنه يغطي المقلة بس لا أكثر ولا أقل . يمكن أول كم وحده تكون كبيرة زيادة أو صغيرة بس عادي بتعرفين كم تحطين بعدين . بعد ما تحطين الخليط حركي المقلة عشان توزعين الخليط عليها خليها تطبخ إلين تبدأ تقلب بنية من تحت بعدين إقلبيها. لو تبين كريب مالح شيلي السكر.يمديك تفرزينها ترى وتسخنينها بالفرن أو الميكروييف .
————————————————————————————————————————————————————————–
الوافل .. Waffles
٤ أكواب طحين ونص
ملعقتين شاهي بيكنج صودا
4 ملاعق شاهي بيكنج باودر
ملعقتين شاهي ملح
3 ملاعق كبيرة سكر
٢/٣ كوب زبدة سايحة ( حوالي أصبع ونص)
٥ بيضات مخلوطة شوي
3 وربع كوب حليب أوأكثر لو تبين تكون خفيفة مرررة
أنخلي المواد الصلبة و صبي عليها السايلة و أخلطي إلين تسير ناعمة بس …..
سخني مكينة الوافل على أحر شي و أدهنيها لو كانت تحتاج دهن
صبي شوي من الخليط في المكينة قفليها بعدين إقلبي المكينة عشان توزعين الخلطة صح
خليها تطبخ بعدين شيلي الوافل من المكينة وقدميها .
————————————————————————————————————————————————————————–
حشوة البيكان للباي .. Pecan Pie filling
٣بيضات
١/٢كوب سكر بني غامق
٣/٤كوب سكر ذرة أو شراب ذرة
٣ملاعق زبدة ذايبة
ملعقة فانيلا
رشة ملح
كوبين بيكان
سخني الفرن على ٣٧٥ بعدين
أخلطي البيض والسكر بخلاط كهربائي بعدين حطي شراب الذرة و الملح
و الفانيلا آخر شي أخلطي معاهم البيكان .
وبس حطيها في القشرة الجاهزة بعدين في الفرن إلين تجمد حوالي ٢٥ دقيقة
خليها تبرد زيييين بعدين كليها .
————————————————————————————————————————————————————————–
صوص البتر سكوتش .. Butterscotch Sauce
150 جم زبده يعني أصبع ونص
250 جم سكر بني غامق
300 مل قشطة خفق
ذوبي الزبده و السكر مع بعض على حراره وسط إلين يبدأ السكر يذوب . شيلي الخليط من الحراره وحطي الكريمه و رجعيها عالنار إلين تبدأ تغلي . صفي الخليط و أحفظيها في الثلاجه
————————————————————————————————————————————————————————–
صوص الدونات ( السكر ) .. Liquid fondant
١/٤كوب حليب سخنيه في قدر إلين ما يسخن شوي
بعدين حطي عليه كوبين سكر مطحون و أخلطي
غطسي الدونات في الخلطة وهي حارة وحطيها على شبك عشان تبرد .
لاحظي إن الخلطة هذي راح تجمد بسرعة لو بردت
فأفضل شي تشيلينها من النار وتحطينها في صحن فوق حمام مائي.
————————————————————————————————————————————————————————–
فروستنج جوز الهند .. Coconut Frosting
علبتين حليب جوز هند تخلينهم يغلون غليه خفييييفة إلين يصيرون كوب ونص تقريبا حوال٢٥- ٣٠دقيقة بعدين تاخذين من الخليط هذا ١/٣ كوب بس ….
أصبعين زبده دافيه
كوبين ونص سكر بودرة
عود فانيلا لو عندك أو فانيلا سايلة لوتبين .
رشة ملح
أخلطي الزبده بخلاط على سرعة عاليه إلين تنفش بعدين أضيفي السكر
و الحليب حق جوز الهند… وباقي الأغراض كلها وأخلطيهم إلين ينخلطون بس !!
————————————————————————————————————————————————————————–
فطيرة الخوخ (Peach Pie)
كوبين ونص طحين أبيض لجميع الإستخدامات
٥ ملاعق صغيرة سكر
رشة ملح
١٠ملاعق كبيرة زبدة ( أصبع و ربع ) مقطعه مربعات حجمها حوالي صانتي بااااااارده هنا السر ترى.
٣/٤كوب + ملعقتين كبار لبن (موب حليب ولا زبادي لبن عادي ) بااااااااارد
للحشوة :
٣/٤كوب + ملعقة كبيرة سكر
١/٤كوب طحين
ملعقة ونص كبيرة ليمون
نص ملعقة صغيرة قرفة
ربع ملعقة صغيرة هيل
كيلوين خوخ طازج
ملعقتين زبدة باردة مقطعه صغار
بيضه مخلوطه شوي .
في خلاط مولينكس أخلطي الطحين و السكر و الملح ..
بعدين أضيفي الزبدة و أخلطي على شكل دفعات قصيرة جدا …
يعني لا تخلينه يشتغل إلين كل شي ينطحن !!
لأ بس ضغطه بعدين توقفين بعدين ضغطه ثانيه وكذا إلين يصير حجم الزبدة تقريبا حجم حبة البازلاء
بعدين وقفي… تاخذ حوالي ٢٥ ضغطه .بعدين أضيفي الللبن وأخلطي شوي إلين تكون كتل رطبة
جمعي العجينة بيدك و بعدين أقسميها نصين واحد أكبر من الثاني عشان واحد فوق و الثاني تحت ..
بعدين لفيها بنايلون وحطيها في الثلاجة ساعة كاملة أو يوم بعد أفضل .
للحشوة:
أخلطي ٣/٤ كوب السكر + الطحين + الليمون + البهارات في صحن
بعدين أطبخي الخوخ في مويه مغليه ٣٠ ثانية بالكثير،
بعدين أنقليها لمويه بااااااااارده مع ثلج عشان توقفين الطبخ وعشان تقشرينها بسهولة .
بعدين أفركي القشر بيدك وبيطلع معك بسهوله ، أقطعيه بالنص
وشيلي البذرة اللي في النص بعدين خليه يبرد .
قطعي الخوخ إلى قطع وحطيها على الخلطة اللي سويناها فوق إلين تنزل عصارته
حوالي ٢٠ دقيقة . مع التحريك كل شوي .
سخني الفرن ل ٤٠٠فهرنهايت من تحت .. أفردي العجينة الكبيرة
على سطح مرشوش بشوي طحين إلين توصل حوالي ١٢ – ١٣ إنش،
بعدين حطيها في صحن حق الباي بقطر حوالي ٩ إنش .
قصي الأطراف الزايدة بس بقي ٣/٤ إنش تقريبا .
صبي الخليط حق الخوخ بعدين قطعي باقي الزبدة عليها في أماكن متفرقة
أفردي العجينة الثانيه إلين تصير ١٢ إنش بعدين حطيها فوق العجينة الأولى .
الحين عشان الشكل الحلو .. لصقي الزايد من الطبقة اللي تحت مع الطبقة اللي فوق
بإنك تضغطينها مع بعض .
بعدين أطويها على تحت ولصقيها في أسفلها . عشان تصير زي الحبل تقريبا حولين الباي
إن شاء الله فهمتي وش أقصد .
الحين أقطعي كم فتحة في سقف الباي عشان ما تنفجر في الفرن
بس مجرد فتحات صغيرة تكفي . بعدين أمسحيها بالبيض ورشيها بالسكر الباقي .
حطيها في الفرن في وسط الفرن تماما حوالي ٥٠ دقيقة .
حطي صينية في الرف اللي تحتها أو حتى قصدير عشان يمسك أي شي يطيح منها .
لو لقيتي الحشوة تغلي داخل العجينة عادي وطبيعي تلاقين أشياء تطيح منها …
لو لقيتي الوجه تحمر أكثر من اللازم غطيه بورق قصدير بس حطيه عالوجه يعني لا تلصقينه .
خليها تبرد حوالي ساعة بعدين قدميها مع إسكريم لو تحبين أو لحالها
وتراني إلى يومك والله ما سويتها لأني أنتظر وقت الخوخ اللي هو الحين ..
لو جربتيها قوليلي كيف كانت …
————————————————————————————————————————————————————————–
كيش الفطر و السبانخ .. Spinach and Mushroom Quich
أول شي تسوين العجينة :
كوب ونص طحين
ملعقة صغيرة ملح
ملعقة صغيرة سكر
أصبع زبدة مقطع مكعبات حجمها حوالي ١ سم
بيضة
ملعقة صغيرة مويه باردة
بياض بيضة
حطي الطحين و الملح و السكر في خلاط مولينكس ، بعدين حطي الزبدة الباردة و أخلطي شوي إلين يسويلك تكتلات .
بعدين حطي البيضة و المويه بعد ماتخلطينهم مع بعض .
الحين أبدي أعجني العجينة شوي بس !!!! يعني ٤ مرات لاأكثر بس عشان تخلطينها
موب عجن عجن زي الخبز . غلفيها بنايلون ورجعيها الثلاجة ساعةعلى الأقل .
الحين أفردي العجينة ورصيها في صينية التارت ( تكفي العجينة هذي تارت حجمها ١٢ إنش )
بعدين رجعيها الثلاجة ساعة ثانية .
الحين سخني الفرن على ٤٠٠ بعدين سووي زي ما سويت في موضوع التارت
حطي قصدير أو ورق زبدة و أملي العجينة بوزن مثل رز أو حبوب أو أي شي ثاني .
بعدين أطبخيها في الفرن ٢٠ دقيقة . بعدين شيلي الوزن و القصدير و خرميها بشوكة
و كملي طبخ تقريبا ١٠ دقايق أو إلين تبدأ تسير بنية.
الحين أدهني التارت ببياض البيض طبقة جدا خفيفة ، هذي عشان تمنع الرطوبة تتسرب للعجينة.
الحين الحشوة :
ملعقة كبيرة ونص زبدة .
١/٣كوب بصل ذاك الفرنسي مدري لو تعرفينه يجي صغير و أحمر ، مقطع بس لو ما عندك ينفع بصل عادي .
١/٤كيلو فطر طازج لو سمحتي مقطع شرايح نحيفة
زعتر بري
٣/٤كوب قشطة خفق
بيضتين
رشة ملح
رشة فلفل
بصلتين خضر مقطعة صغار
نص كوب سبانخ .
ملعقتين جبنة جريير .. Gruyere
الحين ذوبي الزبدة بعدين أطبخي البصل إلين يذبل بعدين حطي الفطر و الملح و الفلفل
وأرفعي الحرارة على أعلى شي ،أطبخي الفطر إلين يبدأ يلون وينطبخ حوالي ٨ دقايق
بعدين نزلي الحرارة و حطي السبانخ وقلبيها . بعدين شيلي الخليط من المقلة على صحن إلين يبرد.
الحين سخني الفرن على ٣٥٠ بعدين حطي الزعتر البري في قاعدة التارت
وبعدين الفطر و السبانخ،بعدين أخلطي القشطة مع البيض وملح وفلفل وصبيها على التارت
بعدين رشي فوقها الجبن والبصل الأخضر.
حطيها في الفرن إلين ما يجمد الكسترد حوالي ٢٥ دقيقة ، بعدين خليها ترتاح ربع ساعة قبل تاكلينها
————————————————————————————————————————————————————————–
كيكه الاناناس المقلوبة .. Pineapple upside down cake
للطبقة اللي فوق :
نص أناناسه مقطعه أرباع بعدين شرايح سمكها تقريبا سانتي.
٣/٤ اصبع زبدة
٣/٤ كوب سكر بني
للعجينة :
كوب نص طحين
ملعقتين صغيرة هيل (دايما رهيب مع الأناناس زي القرفة و التفاح )
ملعقتين صغار بيكنج باودر
رشة ملح
٣/٤ أصبع زبدة دافي
كوب سكر
بيضتين
ملعقة صغيرة فانيلا
١/٢ كوب عصير أناناس غير محلى
سخني الفرن على ٣٥٠
ذوبي الزبدة في مقلة حديد زهري أو ستانلس بعدين حطي السكر البني و أخلطي إلين ينخلط مع الزبدة تقريبا ٤ دقايق. طفي النار بعدين رصي الأناناس فوق البترسكوتش.
أخفقي الزبدة الدافيه مع السكر إلين تصير كريمية بعدين أضيفي البيضه حبه حبه بعدين في صحن ثاني تكونين ناخلة المواد الجافة. الحين حطي نص المواد الجافة عالخليط بعدين حطي الفانيلا و العصير وبعدين النص الثاني من المواد الجافة و أخلطي شوي شوي إلين تعطي خليط متمازج.
صبي الخليط على الأناناس ووزعيه بملعقة بالتساوي بعدين دخلي المقله كلها الفرن إلين يطلع منها عود نظيف تقريبا ٤٥ دقيقة
————————————————————————————————————————————————————————–
كيكة التفاح .. Apple cake
٣ أكواب طحين منخول
نص ملعقة صغيرة قرنفل
ملعقة صغيرة بهار حلو allspice
نص ملعقة صغيرة زنجبيل
ملعقة صغيرة بيكنج صودا
ملعقة صغيرة ملح
نص كيلو تفاح أخضر مقشر ومقطع مكعبات حجمها تقريبا نص صانتي
كوب سكر بني
كوب ونص زيت
كوب سكر أبيض
٣ بيضات
٣ ملاعق صغيرة فانيلا سايلة
٣/٤ كوب بيكان مقطع صغار ( تقدرين تستخدمين جوز لو تبين )
للصوص :
أصبع زبدة
ربع كوب حليب
كوب سكر بني
ملعقة صغيرة فانيلا سايلة
———————————-
سخني الفرن على ٣٥٠
أدهني صينية كيك اللي تجي بعامود بزيت أو زبده
أنخلي الطحين مع البهارات و الملح و البيكنج صودا في صحن .
حطي ٣ ملاعق من الطحين في الصينية حقت الكيكة وهزيها زين عشان توزعين الطحين عالصينية
أخلطي التفاح مع ملعقتين كبار من خليط الطحين في صحن ثاني .
أخلطي الزيت مع كوب من السكر البني وكوب السكر الأبيض و البيض و الفانيلا في صحن ثاني وبخلاط كهربائي أخلطيهم إلين يكونلك خليط ثقيل ومنفوش شوي . أخلطي الطحين و حركي شوي شوي بعدين التفاح و البيكان و أخلطي شوي شوي إلين يكون خليط متجانس .
صبي الخليط في صينية الكيك ودخليها الفرن إلين يطلع منها عود نظيف تقريبا ساعة .
الحين والكيك يبرد نسوي الصوص . نذوب الزبدة في قدر على حرارة وسط . نضيف عليها كوب السكر البني و الحليب ونخليط بعدين نخليه يوصل غليه ونخليه يطبخ على غليه خفيفه ٥ دقايق تقريبا . نطفي النار ونحط الفانيلا . الحين نصب تقريبا ربع كوب من الصوص على الكيك الدافي ونخليه يتشربه تقريبا ربع ساعة بعدين نقلب الكيكة على صحن ونزينها بباقي الصوص
————————————————————————————————————————————————————————–
كيكة الجزر .. Carrot cake
كوبين ونص طحين أبيض + شوي عشان الصينيه
حوالي ٣٤٠ جم جزر مبشور على حجم وسط يعني موب أصغر فتحة في المبشرة ولا أكبر وحدة
تجنبا للمشاكل الله يعينك عاد أوزني الجزر.
ملعقة شاهي بيكنج صودا
ملعقة شاهي بيكنج باودر
١/٤ملعقة صغيرة قرفة مطحونة
١/٤ملعقة صغيرة جوزة طيب مطحون
١/٤ملعقةصغيرة allspice إذا لقيتيه مدري وش إسمه بالعربي
١/٢ملعقة صغيرة ملح
كوب وثلث سكر أبيض عادي
١/٤كوب مضغوط سكر بني غامق
٣بيضات
حوالي ١٧٠ جم زبادي
حوالي ١٧٠ جم زيت
للخلطة اللي فوق :
٢٣٠جم فيلادلفيا
٤ملاعق زبدة دافية
ملعقة صغيرة فانيلا
كوبين سكر مطحونه
سختي الفرن على٣٥٠ فهرنهايت
أول شي إدهني صينية الفرن بزبدة بعدين رشيها بطحين وشيلي الزايد ،
حجم الصينية يفضل تكون دائرية قطرها حوالي ٩ إنش.
أنخلي الموادالجامدة مع بعض ( بدون السكر طبعا السكر يعتبر سايل في الحلويات ) ،
وبعدين حطيهاعالجزر المبشور و أخلطيها شوي بيدك.
الحين حطي المواد السايلة في خلاط معدا الزيت في خلاط و أخلطيهم و بنفس الوقت
صبي الزيت من الفتحة اللي فوق .الهدف هنا
إنك تخلطين المواد مع بعض صح بحيث إنك ما تضطرين تخلطين كثير في الخطوة الجاية وهذا اللي يخلي كيك كثيييييييييييير ناشف.
الحين صبي المواد السايلة على الجامدة و أخلطي بملعقة خشب
حوالي ١٠ ثواني لا أكثر !!!!! حتى لو بقى شوي قطع عادي تروح في الفرن .
صبيها في صينية الفرن وعالفرن حوالي ٤٥ دقيقة بعد ٤٥دقيقة نزلي الحرارة ل ٣٢٥
و أطبخيها زود ٢٠ دقيقة .
طلعيها من الفرن وخليها تبرد يمكن ربع ساعة بعدين طلعيها من القالب وخليها تكمل تبرد
وبنفس الوقت سويي الخلطة اللي فوقها
أخلطي كل المواد ما عدا السكر بخلاط يدوي ، بعد ماينخلطون زين حطي السكر
و أخلطي زييييين . وبس ، خليه في الثلاجة ١٥ دقيقة بعدين زييني الكيك فيه .
————————————————————————————————————————————————————————–
كيكة الشوكولاته .. Chocolate cake
2وربع كوب طحين أبيض
٢وربع كوب سكر
ملعقة شاي بيكنج باودر
١وثلاث أرباع ملعقة بيكنج صودا
ملعقة صغيرة وشوي ملح
كوب شكولاته بودرة
٣ بيضات
ملعقة كبيرة فانيلا*
١/٢كوب + ملعقتين كبار زيت نباتي
١وربع كوب حليب كامل الدسم
١وربع كوب قهوة قوية
عاد إن شاء الله ما يحتاج أشرحلك ….. على ٣٥٠ طريقة المفن ……
يعني حرارة الفرن ٣٥٠ . أنخلي المواد الجامدة ، أخلطي السايلة مع بعض،
بعدين إخلطيهم على بعض و أخلطي شوي بس إلين ينخلطون .
حطيها في صينية مدهونة وعالفرن ٤٠ – ٤٥ دقيقة تقريبا أو إلين ما العود يطلع ناشف ..
خليها تبرد طبعا ربع ساعة تقريبا
————————————————————————————————————————————————————————–
مافن الشوكولاته .. Chocolate muffin
٣/٤أصبع زبدة
كوبين طحين أبيض
٢/٣كوب سكر(المفن هذا موب مررررة حالي و صدقيني كذا أطعم)
٤أونصات أو ١١٣ جرام ،شكولاته غامقة من نوعية جدا جدا ممتازة ، إستخدمي شكولاته نسبة الكاكاو من ٦٤ – ٧٢٪ لا أكثر و لا أقل .مقطعة صغار مررة .
١/٣كوب شكولاته بودرة منخولة .
ملعقة كبيرة بيكنج باودر
١/٢ملعقة شاي بيكنج صودا
ملعقة شاي ملح
واحد وربع كوب لبن كامل الدسم .
بيضة
ملعقتين شاي فانيلا سايلة .
شغلي الفرن على حرارة ٣٧٥ فهرنهايت .. ذوبي الزبدة مع نص الشكولاته في قدر صغير
الحين إنخلي المواد الجامدة كلها مع بعض معدا الشكولاته طبعا .
بعدين إخلطي المواد السايلة في صحن ثاني و أضيفي عليهم الزبدة و الشكولاته اللي سيحناها .
الحين إخلطيهم مع بعض وحركيهم بس شوي ، إلين ما تقريبا ينخلط بالعربي
عادي يكون فيه شوي كتل طحين بتروح بعدين بس أهم شي لا تخلطين كثير ولا بيجيك ناشف كنه خبز.
الحين أضيفي عليهم الشكولاته الباقية و إخلطي بس شوي لا تنسين بس شوي لا تخلطين كثير أبدا.
الحين صبيها في صحون مفن ( موب ورق كب كيك ) لا صحن حديد حق المفن أو سيليكون .
طبعا لو كان سيليكون ما يحتاج تدهنينه بزيت بس الحديد يفضل تدهنينة بزيت .
حاولي إنك توزعينها بالتساوي على الصحون عشان تنطبخ بنفس الوقت .
الحين حطي المفن في الفرن و بعدين إرفعي حرارة الفرن ل ٤٠٠ فهرنهايت لمدة١٠دقايق تقريبا ،
بعدين رجعي الحرارة ل ٣٧٥ وكملي طبخ حوالي ١٠ دقايق زود .
سويي إختبار العود إذا شفتي إنها قربت لأن موب شرط تخلص في نفس الوقت اللي أنا حاط هنا .
————————————————————————————————————————————————————————–
البراونيز .. Brawnies
٣٤٠ جرام شكولاته غامقه ٦٦٪ أو أقل من نوعية ممتازه مقطعه ومقسومه نصين
١١ ملعقة كبيره زبده يعني أصبع و أربع ملاعق مقطعه مربعات
كوب وربع كوب سكر
٣ بيضات
رشة ملح
رشة فانيلا
كوب طحين
كوب بيكان محمص ومفروم أو لوز عادي محمص ومفروم لاحظي مفروم موب مطحون فيه فرق .
٣/٤ كوب قشطة خفق
حجم الصينية يفضل يكون ٩ إنش في ٩ إنش
سخني الفرن ل ٣٥٠ .
أفرشي الصينية بقصدير وخلي القصدير مرتفع زياده عن حواف الصينية حوالي ٢ إنش بحيث ترفعين القصدير بعدين . أدهني القصدير بزبده .
ذوبي الزبده و نص الشكولاته في حمام مائي مع التحريك المستمر ( أنتبهي لا تطولين في هذي العمليه عشان ما تحرقين الشكولاته ) . بعدين خليها تبرد شوي .
أخفقي السكر و البيض و الفانيلا بعدين أضيفي عليهم الشكولاته و الزبده الذايبين وحركيهم زين . الحين أضيفي الطحين و اللوز وحركي شوي بس إلين تتجانس بعدين صبيهم في صينية الكيك المدهونه وحطيها في الفرن حوالي ٢٦ دقيقه إلين يطلع منها عود شوي رطب . طلعيها من الفرن وخليها تبرد على حراره الغرفه .
الحين سويي جاناش بباقي الشكولاته و القشطة حقت الخفق ( تلاقين الطريقة في موضوع الماكرون حقي ) . وبعدين صبيها على البراوني وخليهم يبردون على حراره الغرفه حوالي ٤ ساعات إلين يجمدون مع بعض .
الحين بإستخدام القصدير الزايد أرفعي البراوني من الصينية و قطعيها
————————————————————————————————————————————————————————–
كيكة زنجبيل .. Ginger Cake
١١٢ جرام زنجبيل طازج مبشور
كوب دبس سكر موب دبس رمان ولا دبس تمر دبس سكر !
كوب سكر
كوب زيت
كوبين ونص طحين
ملعقة صغيرة قرفة
نص ملعقة صغيرة قرنفل
نص ملعقة صغيرة فلفل أسود
كوب مويه
ملعقتين صغار بيكنج صودا
بيضتين على حرارة الغرفة
سخني الفرن على ٣٥٠ …
غطي قاع صينية كيك قطرها ٩ إنش بورق زبدة بعد ما تقصينه على شكل دائرة.
أخلطي السكر مع الدبس و الزيت في صحن . في صحن ثاني أنخلي الطحين مع البهارات .
أغلي المويه في قدر صغير وبعد ما تغلي حطي عليها البيكنج صودا بعدين صبييه على خليط السكر و الدبس و أخلطي معهم الزنجبيل.
أخلطي المواد الصلبه عالسايلة شوي شوي و ضيفي البيض بين الدفعات حبه حبه إلين يكونلك خليط متجانس. صبي الخليط في الصينية وحطيها في الفرن تقريبا ساعة أو إلين يطلع منها عود نظيف.
بردي الكيكة نص سعة عالأقل قبل تاكلينها .
————————————————————————————————————————————————————————–
الكريم باتسيية .. Pastry cream
٦ صفارات بيض
٣/٤ كوب سكر
٦ ملعق كبيره نشا
رشه ملح
٣ أكواب حليب كامل الدسم
عود فانيلا أو ملعقة كبيره فانيلا سايله . طبعا أي نكهة تنفع محد قال إنه بس فانيلا .
أبدي أول شي بإنك تسخنين الحليب مع عود الفانيلا لو بتستخدمينه . لو منتب مستخدمه عود لا تحطين الفانيلا الحين . سخني الحليب إلين يبدأ يغلي بس يعني تبدأ تطلع بلالين عالجنب .
الحين والحليب يغلي أخفقي صفار البيض مع السكر والملح بقووووه إلين يصير فاتح . بعدين حطي النشا وأخلطيه معهم شوي .
بعدين أبدي صبي الحليب بالتدريج .. أول شي طبعا تصبين ملعقة كبيره وتخلطينها زين .. بعدين ملعقة ثانيه وتخليطينها زين .. وكذا …. بعد ما تبدين تحسين إن خليط البيض صار شوي دافي حطي كل الحليب مره وحده و أخلطيه زييييين .
الحين رجعي الخليط لقدر نظيف وأطبخيه على حرارة هاااااااديه وطول الوقت تقريبا حركيه بالخفاقه حقت البيض لاتوقفين فترات طويله ولا راح يتكتل عليك وتكرهين نفسك . أول ما يبدأ يغلي خليه حوالي دقيقتين عشان تشيلين طعم النشا منه . بعدين علطول أنقلي الخليط لصفايه وصفيه زين كونه يمكن يكون فيه كتل .
الحين عشان خطر تسمم .. حطي الصحن اللي فيه الكسترد الحار في حمام ثلجي وحركيه من فترة لفترة . مهم جدا إنك تبردين الكسترد بسرعه عشان كذا نستخدم حمام ثلجي . بردي الكسترد بعدين أنقليه للثلاجه وغطيه بنايلون بس يكون على وجه الكسترد موب عالصحن بس عشان ما يطلعلك قشره بعدين . خليه يبرد زييييين قبل تستخدمينه
————————————————————————————————————————————————————————–
موس شوكولاته .. Chocolate mousse
٢٢٠ جرام شكولاته غامقه لا تزيد عن ٧٠ ٪
٣/٤ أصبع زبده مقطع مكعبات
٣ بيضات مفصولة
كوب قشطة خفق بااااردة
٥ ملاعق كبار سكر
رشة ملح
………
ذوبي الشكولاته و الزبده مع رشة الملح في حمام مائي إلين تذوب بس موب أكثر من كذا ..
أخفقي صفار البيض إلين يصير لونه باهت وينفش شوي . أخلطي الصفار على الشكولاته و الزبده الذايبه .
سويي مرانج فرنسي ببياض البيض مع نص السكر .
سويي ويب كريم بالكريمه مع السكر الباقي . ثبتي الويب كريم بجيلاتين لو كنتي بتحفظينه أكثر من يوم .
الحين أخر شي أخلطي الويب كريم و المرانج على الشكولاته شوي شوي بعد ما تنخلط قسميها على أكواب وغطيها بنايلون وحطيها في الثلاجه .
معلومات عن الشكولاته تلاقينها في موضوع الشكولاته
معلومات عن المرانج الفرنسي وكيف تسوينه تلاقينه في موضوع المرانج
معلومات عن الكريمة المخفوقه وكيف تثبتينها بجيلاتين وكم تحطين جيلاتين تلاقينه في موضوع الكريمة المخفوقة .
————————————————————————————————————————————————————————–
خبز الموز .. Banana Bread
٣ وربع كوب طحين
ملعقتين صغار بيكنج صودا
١/٢ ملعقة صغيرة قرفة
١/٢ ملعقة صغيرة ملح
٤ بيضات على حرارة الغرفة
كوبين وثلث سكر
كوب زيت
٣ أكواب موز مهروس ( تقرياب ٦ موزات )
١/٤ كوب ساور كريم
ملعقتين صغار فانيلا
كوب وثلث جوز محمص ومقطع كبار
سخني الفرن على ٣٥٠ .
أدهني صينيتين خبز بزبدة بعدين رشيها بطحين وشيلي الزايد .
أنخلي الطحين مع البيكنج صودا و الملح و القرفة
أخفقي البيض و السكر في صحن بخلاط كهربائي إلين يثقل ويصير خليط فاتح (تقريبا ١٠ دقايق) ، نزلي سرعة الخلاط و أضيفي الزيت شوي شوي . أخلطي الموز و الساور كريم و الفانيلا بعدين بدون الخلاط أضيفي خليط الطحين و الجوز وحركيهم شوي شوي .
قسمي الخليط على صياني الخبز ( يفضل تستخدمين ميزان عشان يستوون بنفس الوقت ) . بعدين حطي الخليط في الفرن إلين يطلع منه عود نظيف تقريبا ساعة إلى ساعة وربع
————————————————————————————————————————————————————————–
عجينة الشو .. Pate a choux
١/٢ كوب حليب
١/٢ كوب مويه
أصبع زبدة
ربع ملعقة صغيرة سكر
ربع ملعقة صغيرة ملح
كوب طحين
٥ بيضات على حرارة الغرفة
أغلي الحليب و المويه و الزبده و الملح و السكر . أول ما يغلي بقوة حط الطحين كله مره وحده وحرك ونزل الحرارة للوسط . حرك الخليط بملعقة إلين تتكون طبقة بنية في قاع القدر وبعدها كمل عجن بالملعقة دقيقتين إلى ثلاث دقايق . حط العجينة في صحن وأخلطها بخلاط مع إضافة البيض بيضه بيضه إلين يكون خليط ناعم .
————————————————————————————————————————————————————————–
الكريم كاراميل .. Creme Caramel
كوبين قشطة خفق
كوب حليب
عود فانيلا أو ملعقة كبيره فانيلا سايلة
كوب سكر
3 صفارات بيض
بيضتين
رشة ملح
1/2 كوب سكر للكراميل
ربع كوب مويه للكراميل
حطي الصحون في الفريزر وسخني الفرن على 300
الحين حطي نص كوب السكر مع المويه في قدر و خليه يغلي ، أول ما يوصل غليه غطي القدر وخليه دقيقتين تقريبا بعدين شيلي الغطاء وخليه يطبخ إلين يصير لونه على ذهبي. إذا وصل لون كاراميل خفيف علطول طفي النار وصبي شوي من الكاراميل في الصحون البارده . نخلي الصحن بارد عشان يبرد الكاراميل بسرعه وما ينحرق علينا وهو في الصحن زي ما يصير دايما.
الحين أغلي الحليب و القشطة مع عود الفانيلا لو كنتي بتستخدمين . خليه إلين يبدأ يغلي بس بعدين طفي النار علطول .
في صحن معدني أخلطي البيض بقوه بعدين حطي السكر و الملح و كملي خلط إلين يصير لونه فاتح شوي ، حطي الفانيلا السايلة لو كنتي بتستخدمينها هنا. الحين أبدي صبي القشطة و الحليب الحار شوي شوي على البيض . الحين صبي الكسترد على الصحون اللي فيها الكاراميل وحطيها في حمام مائي ( شوفي موضوع التشيز كيك إذا ما تعرفين كيف ) . دخليها الفرن حوالي نص ساعة إلى ٤٥ دقيقه .. تعرفين إنها أستوت بإنك تهزين الصحون شوي المفروض تهز شوي في الوسط بس الأطراف تكون شوي قاسية . لا تخلينها إلين تجمد !! أكبر خطأ في الكسترد إنه ينطبخ أكثر من اللازم ..
طلعيها من الحمام المائي وخليها تبرد شوي بعدين حطيها في الثلاجه ٤ ساعات على الأقل أو ليلة كامله أفضل . فكي الأطراف بسكين بعدين أقلبيها على صحن
————————————————————————————————————————————————————————–
كيكة شيفون بالبرتقال … Orange chiffon cake
٢ وربع كوب طحين كيك
١ ونص كوب سكر
ملعقة كبيره بيكنج باودر
١/٢ ملعقة صغيره ملح
نص كوب زيت
٧ صفارات بيض
٣/٤ كوب عصير برتقال طازج !! بعدي عن السنتوب ههه
٢ ملعقة كبيره بشر برتقال
ملعقتين صغار فانيلا
٩ بياضات بيض بدون أي أي أي نقطة وحده من الصفار !! مهم جدا !!!
ملعقة صغيره كريمة ترتار أو عصير ليمون
التغطيه :
كوبين قشطة خفق بااااااااااردة
٣ ملاعق كبيره عصير برتقال
ملعقتين صغار بشر برتقال
١/٤ كوب سكر
١/٤ ملعقة صغيره موية ورد
أنخلي الطحين و البيكنج باود و ٣/٤ كوب من السكر و الملح في صحن كبير . بعدين في صحن ثاني أخفقي صفار البيض مع عصير البرتقال و الزيت و بشر البرتقال و الفانيلا . أخلطي الخليط السايل على الجامد وأخلطي شوي شوي إلين يصير ناعم بس .
الحين في صحن معدني نظيييييييييييف ومضارب خلاط بعد لازم تكون نظييييفه … أخفقي بياض البيض مع كريمة الترتار ورشة ملح على أعلى سرعة إلين تصير زي الرغوه بس لسا سايله شوي بعدين حطي باقي السكر شوي شوي و أخفقيهم أكثر إلين توصل مرحلة منقار الطير .
أخلطي ١/٣ خليط المرانج على خليط الكيك زين عشان نخففه . بعدين حطي باقي المرانج كله بس هذي المرة أخلطيهم شوي شوي شوي شوي …. أنتبهي تخلطين بقوه كون الهواء اللي في المرانج هو اللي بيخلي الكيكة خفييييييفه .
صبي الخليط في صينية كيك اللي تجي لها عامود من النص .. اللي تطلع الكيك دائري بس مجوف في النص إن شاء الله فهمتيني . مهم جدا تستخدمين هذي الصينة كون الكيك هذا شوي حساس وضعيف هيكله مره ويحتاج شي يتمسك فيه زي العامود اللي في النص مثلا . شي ثاني لا تدهنين الصينية أبدا !!.. يفضل تستخدمين الصياني من هذا النوع اللي تكون قاعدتها متحركه كونه صعب بعدين تطلعين الكيك .
دخلي الكيك على فرن مسخن على ٣٢٥ حوالي ساعة أو إلين يطلع منها عود نظيف .
الحين أقلبي صينية الكيك علطول على شبك تبريد وخليها كذا إلين تبرد تماما ! مهم جدا إنك تبردين الكيكه بالمقلوب لا تطلعينه من الفرن وتخلينها على طاولة المطبخ إلين تبرد كونها صعب مره تطبع بعدين .
بعد ما تبرد مرري سكين نحيفة على أطراف الكيك و العامود اللي في النص وطلعيها من القالب .
الحين يمديك لو تبين تقطعينها بالنص بشكل أفقي وتحشينها . أو يمديك تخلينها زي ماهي وتحطين التغطيه عليها وخلاص .
التغطيه :
حطي صحن معدني مع المضارب حقت الخلاط في الفريزر نص ساعة تقريبا عشان تصير بااااااردة .. بعدين حطي فيها القشطة حقت الخفق مع باقي المكونات و أخفقي على أعلى سرعة إلين توصل مرحلة منقار الطير . غطي فيها الكيكه وزينيها لو تبين بعد زياده بملبس قشر البرتقال عشان تزيد الطعم
الأربعاء أكتوبر 31, 2018 2:32 pm من طرف farawela
اليومية
