البوب اوفرز والوركشير بودنج .. Yorkshire pudding
بيضتين
كوب حليب كامل الدسم
كوب طحين أو أفضل لو توزنينه يطلع ١٣٤ جرام
ملعقة كبيره زبده ذايبة
نص ملعقة صغيرة ملح
كل المقادير خليها على حرارة الغرفه قبل الخلط ..
سخني الفرن على ٤٠٠
أدهني قواب مفن بزبده ذايبه ..
الحين بعد ما يحتر الفرن سويي الخلطة في خلاط حطي المقادير كلها و أخلطي تقريبا ٣٠ ثانية موب أكثر أو أقل.
صبي الخليط في قواب المفن ولا تملينها أكثر من النص بعدين دخليها الفرن. لا تفتحين الفرن أببببدا ! بعد ٤٠ دقيقه طلعيها من الفرن وعلطول أخرميها بسكين عشان البخار يطلع وما تترطب. بعدين حطيها على شبك تبريد إلين تبرد تماما ..
بعد ما تبرد تقدرين تحفظينها في علبة تتقفل بإحكام يومين على حرارة الغرفة .. أو تقدرين تفرزينها تقريبا ٤ شهور …
لو بتسويين يوركشر بودنج سويي نفس الشي بس بدلي الزبده ب ملعقتين كبار من دهن اللحم .. حطي ملعقة كبيره منهم مع الخلطة و الملعقة الثانيه وزعيها في صحون المفن … الحين حطي الصحون حقت المفن مع الدهن في فرن ٤٠٠ وخليه يحتر بعدين طلعي الصحون وحطي الخلطة ورجعي الحصون الفرن مره ثانيه وكملي زي البوب أوفر ..
————————————————————————————————————————————————————————–
الكب كيك .. Cupcakes
الشكولاته :
٣/٤ كوب لوز مقشر
كوب ونص سكر
2 أكواب جوز هند محلى ( نارجيل )
كوبين وربع طحين
١/٢ كوب بودرة كاكاو
ملعقة كبيره بيكنج باودر
ملعقة صغيره بيكنج صودا
نص ملعقة صغيرة ملح
٦٠ جرام شكولاته مرة أو في أسوأ الحالات غامقة .. مرة يعني فيها أكثر من ٨٠٪ كاكاو بتلاقين مكتوب عالعلبة .
أصبعين وربع زبده
٤ بيضات على حرارة الغرفة
علبة حليب جوز هند سايل .
ملعقتين صغار فانيلا سايلة أو ملعقة صغيره بودرة
سخني الفرن على ٣٥٠ وأدهني صحون مفن .
في خلاط مولينكس . أخلطي اللوز و ١/٢ كوب من السكر إلين يصير شوي بودرة . حطي عليهم كوبين جوز هند و أفرميهم شوي زياده . حطي الخليط في صحن و أخلطي عليه الطحين ، الشكولاته ، البيكنج باودر و البيكنج صودا و الملح .
ذوبي الشكولاته في حمام مائي ( أو الميكروييف لو تبين ) .
الحين بخلاط .. أخلطي الزبده مع كوب السكر الباقي إلين يصير كريمي . بعدين أضيفي البيض بيضه بيضه وبعدين الشكولاته الذايبه . أضيفي نص خليط الطحين و أخلطي إلين يبدأ ينخلط معه ( على أقل سرعة ) . بعدين أضيفي حليب جوز الهند و الفانيلا بعدين باقي الطحين .
وزعي الخليط في الصحون ودخليه الفرن حوالي ٢٥ دقيقه أو إلين يطلع منها عود نظيف . خليها تبرد تماما .
هذى الكب كيك رهيييييييييييييب لا يفوتك صدق رهيب
————————————————————————————————————————————————————————–
سكونز .. Scones
كوبين طحين
١/٤ كوب سكر
ملعقتين صغار بيكنج بودر
١/٤ ملعقة صغيره ملح
١/٣ كوب زبده باااااااااااارده أو ٧٥ جرام تقريبا
بيضه
ملعقة صغيره فانيلا
١/٢ كوب قشطة خفق + شوي زياده لمسح الوجه
سخني الفرن ل ٣٧٥ وبعدين غطي صينية فرن بورق بارتشمن
في صحن أنخلي الطحين و السكر و الملح و البيكنج باودر . بعدين قطعي الزبده صغار وحطيه عليهم . الحين أفركي الزبده بالطحين شوي شوي بدون ما تذوبين الزبده بحراره ييدك . إلين يكونلك كتل زبده حجم حبه الحمص تقريبا
في صحن ثاني أخلطي القشطه و البيض و الفانيلا . الحين حطي السوائل وحركي شوي بس إلين تنخلط لا تكثرين خلط أبدا !!!
أعجني العجينه بيدك ٥ أو ٦ مرات بس ! موب أكثر من كذا لاحظي قلت مرات مو دقايق ههههه
أفردي العجينه لدائره حجمها حوالي ١٨ سم بعدين بقطاعه قطعي دوائر منها . أو لو تبين أفرديها على شكل مربع و أستخدمي قطاعه مربعه وكذا ما يضيع عجين كثير
حطي اللي تقطعينهم عالصينيه بعدين أدهنيهن بشوي قشطه . وبعدين دخليهم الفرن حوالي ١٥-١٨ دقيقه أو إلين يطلع منها عود نظيف
————————————————————————————————————————————————————————–
حشوة جوز الهند للماكرون .. Coconut Macaron filling
كوب سكر
١/٣ كوب نشا ذرة
كوبين حليب
علبة حليب جوز هند تقريبا ٤٠٠ مل . أقصد هنا العلب المعدن تلاقينها في السوبرماركت موب البودرة .
٦ صفارات بيض
أغلي الحليب وحليب جوز الهند إلين يوصل شبه غليه بس .
وهو يغلي أخفقي السكر مع النشا وصفار البيض وحركيهم إلين يصير لون الصفار أصفر باهت .
الحين صبي الحليب الحار على خليط الصفار شوي شوي في البدايه بعدين كبيه كله مع التحريك طبعا .
رجعي الخليط للقدر و رجعيه على نار هاديه مع التحريك المستمر إلين يغلي .
بعد ما يغلي خليه دقيقه تقريبا يطبخ عشان يروح طعم النشا بعدين شيلي الخليط وصفيه بصفايه على صحن معدني .
حطي الصحن المعدني بحمام ثلجي إلين يبرد الخليط تماما بعدين حطي طبقه نايلون على الوجه وحطيه في الثلاجه ٤ ساعات على الأقل
————————————————————————————————————————————————————————–
الملفيه .. Millefeuille
6صفارات بيض
٣/٤ كوب سكر
٦ ملعق كبيره نشا
رشه ملح
٣ أكواب حليب كامل الدسم
عود فانيلا أو ملعقة كبيره فانيلا سايله . طبعا أي نكهة تنفع محد قال إنه بس فانيلا .
أبدي أول شي بإنك تسخنين الحليب مع عود الفانيلا لو بتستخدمينه . لو منتب مستخدمه عود لا تحطين الفانيلا الحين . سخني الحليب إلين يبدأ يغلي بس يعني تبدأ تطلع بلالين عالجنب .
الحين والحليب يغلي أخفقي صفار البيض مع السكر والملح بقووووه إلين يصير فاتح . بعدين حطي النشا وأخلطيه معهم شوي .
بعدين أبدي صبي الحليب بالتدريج .. أول شي طبعا تصبين ملعقة كبيره وتخلطينها زين .. بعدين ملعقة ثانيه وتخليطينها زين .. وكذا …. بعد ما تبدين تحسين إن خليط البيض صار شوي دافي حطي كل الحليب مره وحده و أخلطيه زييييين .
الحين رجعي الخليط لقدر نظيف وأطبخيه على حرارة هاااااااديه وطول الوقت تقريبا حركيه بالخفاقه حقت البيض لاتوقفين فترات طويله ولا راح يتكتل عليك وتكرهين نفسك . أول ما يبدأ يغلي خليه حوالي دقيقتين عشان تشيلين طعم النشا منه . بعدين علطول أنقلي الخليط لصفايه وصفيه زين كونه يمكن يكون فيه كتل .
الحين عشان خطر تسمم .. حطي الصحن اللي فيه الكسترد الحار في حمام ثلجي وحركيه من فترة لفترة . مهم جدا إنك تبردين الكسترد بسرعه عشان كذا نستخدم حمام ثلجي . بردي الكسترد بعدين أنقليه للثلاجه وغطيه بنايلون بس يكون على وجه الكسترد موب عالصحن بس عشان ما يطلعلك قشره بعدين . خليه يبرد زييييين قبل تستخدمينه
هذا اللي فوق هو الكسترد حقه ….
القشرة تسوينها من بف بيستري . تفردين البف بيستري عادي بعدين تخرمينها بشوكه . حطيها على صينية ودخليها الفرن حسب الحراره المكتوبه على علبه البف بيستري و أطبخيها إلين تبدأ تتلون بس . خليها تبرد بعدين حطي الكسترد ( بعد ما يبرد طبعا ) فوق القشرة .
آخر شي التغطيه أو الفوندانت حقها :
كوب سكر بودره
ملعقتين كبار زبده مذوبه ومبرده
ملعقتين كبار حليب
رشة ملح
ملعقتين كبار شكولاته بودره …
تخلطين الزبده مع السكر و الحليب بخلاط إلين يكونلك خليط سايل . الحين خذي ربع الخليط و أخلطي معه الكاكاو .
أدهني الوجه الأخير حق الملفيه بالفوندانت . بعدين سويي خطوط بالعرض بالفوندانت الشكولاته .آخر شي بسكين وصلي بين الخطوط العرضيه عشان تعطيك الشكل المعروف حق الملفيه .
بس هذا الملفيه ….
خليه يبرد في الثلاجه يمكن نص ساعة قبل تاكلين عشان تتمازح النكهات .
————————————————————————————————————————————————————————–
عجينة المارزبان .. Marzipan
١٥٥ جرام لوز مطحون
بياض بيضه
رشه ملح
ملعقة صغيره فانيلا سايله أو بودره
كوب وربع تقريبا سكر مطحون
أخفقي بياض البيضه مع الملح و الفانيلا وأخفقي شوي إلين يذوب الملح ويصير خليط رغوه . بعدين حطي اللوز و أخلطيه معهم وبعدين السكر وراح تتكونلك عجينه . أعجني العجينة بيدك شوي إلين يكونلك عجينه شوي قاسيه وبس هذا المارزبان .
هذي الطريقة إختصار للطريقة اللي دايما منتشره اللي تستخدم نفس المكونات بس تطبخين السكر مع مويه لمرحله معينه المشكله إنه صعب بدون ميزان حراره تعرفين متى توقفين طبخ عشان كذا أسهلك الطريقة هذي .
غطي العجينه ببلاستك وراح تقعد طريقه معك وقت طويل في الثلاجه .
————————————————————————————————————————————————————————–
مفن تفاح بالبهارات
كوب ونص طحين
ملعقة ونص صغار بيكنج باودر
نص ملعقة صغيرة بيكنج صودا
نص ملعقة صغيرة قرفة
نص ملعقة صغيرة allspice فلفل حلو
ربع ملعقة صغيرة جوزة طيب
ربع ملعقة صغيرة ملح
بيضتين
كوب سكر بني
أصبع زبده ذايب
كوب من صوص التفاح applesauce
كوب جوز أو بيكان مقطع صغار
الطبقة اللي فوق :
ملعقتين كبار سكر
ربع ملعقة صغيرة قرفة
ربع ملعقة صغيرة allspice
ربع ملعقة صغيرة جوزه طيب
سخني الفرن على ٣٨٠ وأدهني قوالب المفن .
أنخلي المواد الجافه مع بعض ( بدون المكسرات ) . وأخلطي المواد السايلة مع بعض في صحن .
أخلطي المواد السايلة على الجامده و أخلطي شوي شوي إلين ما تقريبا ينخلطون بس يبقى شوي كتل طحين ( بتختفي بعدين لا تخافين ) . الحين حطي المكسرات و أخلطي شوي . وزعي الخليط على صحون المفن .
أخلطي مكونات الطبقة اللي فوق في صحن ورشيها فوق المفن بعدين دخليه الفرن و أرفعي الحراره ل ٤٠٠ . خليه في الفرن إلين يطلع منها عود نظيف حوالي ٢٠ دقيقه .
————————————————————————————————————————————————————————–
زبدة تفاح .. apple butter
ال apple butter مربى تفاح ثقيل . إستخداماتها بعد موب بعيدة عن المربى سواء تدهنين توست فيها أو مثلا في كيك . ممكن طبعا تستخدمينها في الحلويات أو الموالح بس مالها إستخدام واحد محدد .
طريقتها سهلة بس تاخذ وقت صراحة .
كيلو تفاح أحمر مقشر ومقطع أرباع بعدين تشيلين البذور
كيلو وربع تفاح أخضر مقشر ومقطع أرباع وبعدين تشيلين البذور .
٤ أكواب سكر
ملعقة كبيره خل تفاح
٣ ملاعق كبار مويه
١/٢ ملعقة صغيرة قرفة
١/٢ ملعقة صغيرة جوزة طيب ( إختياري )
حطي التفاح مع السكر في قدر و أطبخيهم على حرارة أقل من وسط بشوي إلين يذوب السكر تقريبا . بعدين حطي الخل و المويه . غطي الخليط وخليه يطبخ على هذي الحرارة 3 ساعات تقريبا مع التحريك من فترة لفترة . بعد 3 ساعات نزلي الحرارة أقل وخليه يطبخ إلين تلاقين إن التفاح صار ذااااايب مره يمكن 5 – 9 ساعات . بعد ما يذوب التفاح حطيه في خلاط و أطحنيه بعدين رجعيه للقدر و أطبخيه على غليه جدددددا خفيفه مع البهارات إلين يثقل ويقلب صوص تفاح من ساعة إلى ٤ ساعات تقريبا .
————————————————————————————————————————————————————————–
كب كيك فراوله .. Strawberry cupcake
الصوص :
كيلو إلا ربع فراولة مجمده مذوبه في الثلاجه
١/٢ كوب سكر
عود قرفة
حبة يانسون
عود فانيلا
أطحني الفراولة في خلاط
خذي كوب وربع من الفراولة هذا للخليط حق الكيك . و الباقي حطيه في قدر مع اليانسون و الفانيلا و السكر و القرفه وخليهم يغلون على غلبة خفيفه إلين يذوب السكر و يتبخر نص الخليط تقريبا ويثقل . طفي النار وشيلي الفانيلا و القرفة و اليانسون وحطي الخليط في الثلاجه .
الكيكة :
٤ أكواب ونص طحين كيك
٣ أكواب سكر
٥ وبع ملعقة صغيرة بيكنج باودر
٣/٤ ملعقة صغيرة ملح
٣٤٠ جرام زبده . يعني ٣ أصابع و ٤٠ جرام . على حرارة الغرفه
كوب وربع من الفراله المطحونه .
٨ بياضات بيض
٢/٣ كوب حليب
سخني الفرن على ٣٥٠ .
رصي قواب الكب كيك بورق الكب كيك .
في خلاط أخلطي الطحين مع السكر و البيكنج باودر و الملح على سرعة خفيفه إلين ينخلطون زيييين . أضيفي الزبده وكملي خلط على سرعة خفيفة إلين تكونلك زي الفتات . الحين أضيفي الفراوله وزيدي السرعة لوسط وخليه يشتغل إلين يصير الخليط كريمي .
أخلطي بياض البيض و الحليب في صحن ثاني . و الخلاط يشتغل أضيفي خليط البيض على ٣ دفعات . قسمي الخليط على صحون الكب كيك ودخليها الفرن إلين يطلع عود نظيف . حوالي ٢٢ دقيقة .
التغطيه :
نص كيلو جبن فيلادلفيا بارده
٦ أكواب سكر مطحون ناعم
١٧٠ جرام شكولاته بيضاء مذوبه
ملعقتين صغار فانيلا
حطي الفيلادلفيا مع السكر في صحن خلاط و أخلطي على سرعة وسط إلين تصير كريمية .أضيفي الشكولاته الذايبة و الفانيلا و أخلطي إلين تصير خلطة .
حطي شوي من خلطة الفراولة على كل كب كيك إلين تتشربها شوي بعدين حطي التغطيه .
————————————————————————————————————————————————————————–
باي القرع .. Pumpkin Pie
لكل حبة قرع صغيره
١/٢ كوب سكر بني
ملعقتين كبار زبده
ملعقتين كبار قشطة خفق
نص ملعقة صغيره قرفة
نص ملعقة صغيره زنجبيل
إسكريم فانيلا
رشة ملح
داري المقادير دسمه بس لا تبدلين شي ….
الفرن على ٣٥٠
أقطعي القرع نصين وشيلي البذور و الألياف اللي داخل .
الحين أقطعي قطعه صغيييييره من الطرف اللي ما أنقطع . الهدف هنا هو إننا نسوي سطح مسطح بحيث نقدر ندخليها الفرن بدون ما تتحرك .
حطي النصين على صينية فرن بعدين أخلطي باقي المقادير ماعدا الإسكريم في صحن إلين يكونلك خليط .
وزعي الخليط على الفراغ اللي داخل القرع ودخليها الفرن ساعة .
بعد ساعة طلعيها من الفرن وخليها تبرد شوي ٥ دقايق تقريبا . بعدين شيلي الصوص اللي داخل القرع في صحن عالجنب و أقسمي كل نص إلين نصين بحيث يكون عندك ٤ قطع . قدمي ربع قرعه لكل شخص مع الصوص فوقها و الإسكريم .
————————————————————————————————————————————————————————–
خبز الدخن
كوب زبادي
١/٤ كوب زبده يعني نص أصبع
ملعقة كبيره عسل
ملعقتين صغار خميره
١/٤ كوب مويه دافيه
بيضتين
كوبين دخن
١/٢ كوب طحين رز أو نشا ذره
نص معقة صغيرة ملح
أخلطي الزبده و الزبادي في قدر وعلى نار هاديه سخنيهم إلين تذوب الزبده بس .
أخلطي عليهم المويه و العسل .
بعدين أخلطي عليهم البيض .
آخر شي أخلطي الخميره و الطحين و الملح .
صبي الخليط في صينية خبز مدهونه وخليها تتخمر ٤٥ دقيقه تقريبا .
دخليها فرن ٣٧٥ حوالي ٤٠ – ٤٥ دقيقه .
————————————————————————————————————————————————————————–
تشيز كيك الأوريو بالبينت بتر .. Oreo and Peanut butter cheesecake
كوب أوريو مطحون
ملعقتين كبار زبدة
٣٤٠ جرام جبنة فيلادلفيا على حرارة الغرفه
١/٤ كوب ساور كريم على حرارة الغرفة
١/٢ كوب بينت بتر
٢/٣ كوب سكر
بيضه و صفار بيضه على حرارة الغرفة
فانيلا سايلة
رشة ملح
١١٢ جرام شكولاته غامقة من نوعية ممتازه
١/٢ كوب قشطة خفق
ملعقة كبيره زبده على حرارة الغرفه
أخلطي الأوريو مع الزبده و رصيهم في قاع صحون مفن مدهونه بزبده . دخليهم فرن ٣٥٠ حوالي ١٠ دقايق بعدين خليها تبرد تماما .
نزلي حرارة الفرن ل ٣٠٠ .
الحين أخلطي الفيلادلفيا و السكر و الساور كريم و أخلطيهم بخلاط على أقل سرعة ممكنه ( تذكري هذا تشيز كيك وينطبخ عليه أي شي ينطبق على تشيز كيك ) . حطي الفانيلا و الملح و البيض بيضه بيضه وأخلطيهم زين إلين ينخلطون بس . وزعلي الخليط على صحون المفن ودخليها الفرن إلين تستوي حوالي ٢٢ دقيقه (شوفي موضوع التشيز كيك هنا عشان تعرفين متى تستوي) . طلعيها من الفرن وخليها تبرد على حرارة الغرفة . بعدين دخليها الثلاجة وخليها تبرد تماما على الأقل ٤ ساعات .
سويي الجاناش بباقي المواد .
قطعي الشكولاته مكعبات ، سخني القشطة حقت الخفق إلين توصل قريب من الغليان بعدين صبي القشطة على الشكولاته في صحن ، خليها دقيقيتن ، بعدين حركيهم مع بعض وبتلاقين الخليط صار جاناش بعد ما ينخلط حطي الزبده الدافيه .
حطي الجاناش على التشيز كيك بعد ما تخلطين وبس ..
————————————————————————————————————————————————————————–
البريتزل .. Pretzel
تفضلي :
خذي الطريقة ونفس الوصفه تستخدم للبيجل ترى مع تغير بسيط بس .
كوب ونص مويه دافيه
ملعقة كبيره سكر
ملعقتين صغار ملح
ملعقتين صغار خميره
٤ أكواب ونص طحين أبيض
٦٠ جرام زبده تقريبا نص إصبع
ثلثين ملعقة صغيره بيكنج صودا
مويه للسلق
صفار بيضه وملعقة كبيره مويه عشان تغطيه البيض
ملح حق البريتزل أو أي ملح خشن ينفع
في خلاط كينوود أو باليد لو ماعندك … أخلطي الخميره مع الطحين و السكر و الملح و الزبده مع المويه و أخلطي بخطاف الخبز إلين تتكون عجينه بعدين أرفعي السرعه شوي و أعجنيها إلين تصير ناعمه وتلصق أقل .
أدهني العجينه بزيت وخليها تتخمر إلين يتضاعف حجمها .
سخني الفرن على ٤٥٠
غطي صينيتين فرن بورق بارتشمنت وأدهنيها بزيت
الحين جيبي حوالي ١٠ أكواب مويه مع البيكنج صودا وخليها تغلي
قسمي العجينه إلى ٨ قطع أو حسب الرغبه .. أفردي كل واحد منهم إلى حبل طوله حوالي ٢٤ إنش … بعدين سوي حرف يو وبعدين شكلي البريتزل بإنك تاخذين الأطراف حقت الحرق اليو وتلصقينها في الوسط بعد ما تخلينهم يتقاطعون . الحين أغطي على العجينه عشان تلصقين هذي الأطراف بس شوي بعدين شيلي العجينه وأنقليها للصينيه حقت الفرن
الحين أسلقي البرتزل في المويه حوالي ٣٠ ثانيه بس موب أكثر نزليها و أرفعيها منالمويه بملعقه مخرمه زي حقت القلي هذي أسهل طريقة !!! في حاله بغيتي بيجل تسوين نفس الشي بس تحطين عسل مع المويه بدال البيكنج صودا .
الحين حطي البرتزل المسلوق على صينيه الفرن وأدهنيها بالبيض مع المويه وبعدين رشي الملح ودخليها الفرن إلين تتلون وتستوي حوالي ربع ساعة
السلق في البيكنج صودا مهم !! هو اللي بيخلي البرتزل طري من برا بدال ما يكون قشره مره قويه أو يكون مره لين .. غير إنه بيخلي العجينه قاعديه عشان البيكنج صودا وهذا بيخليها تتلون كلها بنفس اللون
————————————————————————————————————————————————————————–
تارت التفاح بالكاراميل … Apple and caramel tart
تارت التفاح عندي يعني لازم كاراميل … جربي هذي …
البتر سكوتش :
كوب ونص سكر بني غامق
كوب ونص قشطة خفق
أصبع زبده
رشة كبيره ملح
حطي المكونات هذي على حرارة وسط إلين يذوب كل شي ويبدأون يغلون . خليه يطبخ مع التحريك المستمر إلين يثقل حوالي ١٠ دقايق .
سويي قشرة تارت حلوه ورصيها في صينية تارت وحطيها في الثلاجه على الأقل ساعة ..
الحين للحشوة :
ملعقة كبار سكر
ملعقة كبيره طحين
نص ملعقة صغيره قرفة
نص ملعقة صغيره هيل
٦ تفاحات خضر أو حمر .. مقشرة ومقطعه أرباع بعد ما تشيلين القلب .
أخلطي أول ٤ مكونات في صحن و بعدين حطي عليهم التفاح وغطيه فيهم ..
سخني الفرن على ٣٧٥
رصي التفاح في صينية التارت وبعدين دخليها الفرن إلين يستوي التفاح حوالي ساعة وربع .. طلعي التارت من الفرن و أدهنيها بشوي من صوص الكاراميل .. خليها تبرد تماااااما .. بعدين رشي شوي صوص كاراميل عليها وقدميها مع الصوص عالجنب
————————————————————————————————————————
الأربعاء أكتوبر 31, 2018 2:32 pm من طرف farawela
اليومية
