المعجنات الحلويات والفطور Desserts and breakfast 4

Admin عدد المساهمات : 4080 تاريخ التسجيل : 07/04/2013

خبز الصودا الآيرلندي .. Irish soda bread
كوبين طحين أبيض
كوبين طحين أسمر
ملعقة صغيره بيكنج صودا
ملعقة صغيره ملح
ملعقة كبار زبده
كوب وربع لبن .. لبن أقصد لبن مو حليب يعني مراعي نادك كذا ..
ممكن إضافه ربع كوب زبيب
سخني الفرن على ٤٠٠
أنخلي الطحين مع البيكنج صودا و الملح في صحن .
بعدين أفركي الزبده مع الطحين إلين تتوزع في الطحين بالتساوي .
الحين سويي زي الحفرة في الطحين وحطي اللبن وحركي بملعقة خشب إلين ينخلط مع العجينه ويكون عجينة لينه وشوي تتفتت .
شيلي العجينة من الصحن وحطيها على طاوله شوي مرشوشه وأعجنيها دقايق بس يمكن ٣ دقايق لا أكثر ..
شكليها على شكل كوره أو ممكن تقسمينها على كورتين أو أكثر بعد بعدين رشيها بالطحين وحطيها على صينية فرن . الحين بسكين سوي علامة X على وجه الخبز ( لاتنسين ترشين الوجه بطحين عشان السكين تقطع بسهولة ) . دخليها الفرن حوالي ٣٥ دقيقه .
————————————————————————————————————————————————————————–
كيكة القرع .. Pumpkin Cake
أصبع ونص زبدة
كوبين وربع طحين
ملعقتين صغار بيكنج باودر
ملعقة صغيرة بيكنج صودا
ملعقتين صغيرة قرفة
ملعقة ونص صغيرة بهار حلو allspice
نص ملعقة صغيرة ملح
كوب وربع قرع مطحون زي حق التشيز كيك
٣/٤ كوب لبن . و أقصد هنا لبن يعني مراعي أو نادك أو غيره موب زبادي ولا ساور كريم ولا حليب.
ملعقتين صغار فانيلا
كوب وربع سكر
٣ بيضات
التغطية :
٣ ملاعق كبيرة لبن + كوب ونص سكر مطحون
——————————-
سخني الفرن ل ٣٥٠
أدهني صينية كيك بندت يعني اللي تجي مفرغة من النص و فيها زي العامود بشوي زبدة وبعدين رشي شوي طحين وشيلي الزايد.
أنخلي الطحين مع الملح و البيكنج صودا و البيكنج باودر و البهارات في صحن. في صحن ثاني أخلطي اللبن مع القرع و الفانيلا.
في خلاط أخفقي السكر مع الزبده إلين يصير خليط كريمي ومنفوش شوي تقريبا ٣ – ٤ دقايق بس لا تخلين الزبده تذوب أو السكر يذوب. حطي عليهم البيض و كملي خلط دقيقه تقريبا . الحين نزلي السرعة لأقل شي و حطي ثلث الطحين وبعدين نص السوائل وبعدين ثلث الطحين وبعدين نص السوائل وبعدين آخر شي باقي الطحين وكملي خلط إلين يصير خليط ناعم بس لا تخلطين أكثر من اللازم.
حطي الخليط في صينية الكيك ودخليها الفرن إلين يطلع منها عود نظيف تقريبا ٤٥ – ٥٠ دقيقه. خلي الكيكة تبرد برا الفرن ربع ساعة بعدين أقلبيها برا الصينية وخليها تبرد زيادة ربع ساعة.
سوي التغطية بإنك تخلطين اللبن مع السكر إلين يعطي تغطية سايلة بعدين صبيه على الكيكة وهي شوي دافيه وخليها تبرد زيادة إلين تجمد التغطية.
————————————————————————————————————————————————————————–
صوص الكراميل (التوفي) .. Caramel Sauce
كوبين سكر
كوب مويه
كوب ونص قشطة خفق
نص أصبع زبدة
ملعقة كبيرة عسل( إختياري بس إجراء إحتياطي )
نكهات لو تبين : جربي معاها قشر برتقال ، فانيلا ، ملح أو الثلاثة مع بعض.
حطي السكر و المويه في قدر ثقيل على حرارة وسط إلى عالية
إذا بدت تغلي غطي القدر عشان الموية اللي تتكثف على الغطاء تمسحلك جوانب القدر وما يتسكر عليك.
بعد دقيقتين شيلي الغطاء وخليها تغلي لا تحركينها أبببببدا إلين ما يبدأ يتحول لونها ذهبي . الحين هزي القدر شوي شوي عشان اللون يتوزع صح إلين ما يوصل لدرجة الكراميل اللي تبينه .
كل ما طبختيه كل ما قلت الحلاوه بس زاد طعم الكراميل وكل ما طبختيه أقل كل ماكان حلو وأفتح وله أقل نكهة كراميل هي شي راجعلك أهم شي لاتحرقونه.
طفي النار وصبي القشطة و الزبدة مع التحريك. طبعا إنتبهي لاتحرقين يدك تراه حااااااااااااااااااااااار وتراه بيغلي بقوة .
الحين خليه يبرد وبتلاقينه بدا يثقل زود.
————————————————————————————————————————————————————————–
ريكوتا بانكيك .. Ricotta Pan
بانكيك الريكوتا تغير حلو عن البانكيك العادي. كون الريكوتا كثيفة هذا يخلينا نقدر نستخدم طحين أقل وهذا يعني بانكيك لين. غير كذا قطع الريكوتا اللي ما تذوب حلوه داخل البانكيك.
بيضتين مفصولة
٣/٤ كوب جبن ريكوتا
١/٣ كوب طحين
١/٣ كوب حليب
٣/٤ ملعقة صغيرة بيكنج باودر
رشة ملح
١/٤ ملعقة صغيرة فانيلا
١/٢ ملعقة صغيرة بشر ليمون
ملعقة كبيرة سكر
أخلطي الجبن مع الطحين و صفار البيض و الحليب و البيكنج باودر و الملح و بشر الليمون و الفانيلا بملعقة خشب إلين ينخلطون شوي شوي.
في صحن ثاني سويي مرانج لمرحلة الرؤوس اللينه مع ملعقة السكر ( راجعي موضوع المرانج الفرنسي شرحت المرانج هناك لو ماتعرفينه ).لا تخفقين المرانج أكثر من المطلوب أنتبهي !
الحين حطي المرانج على خليط الريكوتا و حركيه معهم شوي شوي .
آخر شي سخني مقله ما تلصق على حراره وسط وبعد ما تحتر أدهنيها بشوي زبده وبعدين أطبخي البانكيك عليها.
————————————————————————————————————————————————————————–
أصابع الخبز بالسمسم (جريسسيني تورينيزي) .. Grissini Torinesi
الجريسسيني تورينيزي أصابع خبز إيطالية تقريبا زي الشابورة.
ملعقتين صغار خميره
كوب + ملعقتين كبار مويه
ملعقة صغيره عسل
٣ و ثلاث أرباع كوب طحين ويفضل طحين خبز
ملعقتين صغار ملح
٣ ملاعق كبيره زيت زيتون
ملعقتين كبار سميد
بيضه + شوي مويه لتغطيه الوجه
سمسم ، زعتر ، ريحان .. أي أعشاب أو أي شي تقدرين تحطينه فوق هذا الخبز
أخلطي المويه مع العسل و الزيت بعدين حطي عليهم نص الطحين مع الملح و الخميره و أخلطي إلين يكون عجينة سايله. الحين أبدي زيدي الطحين شوي شوي مع التحريك إلين يعطيك عجينة قاسيه وتلصق.
أعجني العجينة بشكل جيد إلين تتحول لعجينة لينه وتنمط بسهولة بعدين خليها ترتاح بعض ما تغطينها ١٠ دقايق. الحين أفردي العجينة على شكل مستطيل سماكته سانتي وربع تقريبا وخليه يرتاح ١٠ دقايق. قصي العجينة ل ٤ أشرطه بالطول بعدين قصي كل جزأ من الأربع أقسام ل ١٠ أشرطه بالطول.
الحين أدهني صينية فرن بشوي زيت ورشيها بالسميد وسخني الفرن على ٤٠٠.
أمسكي وحده من الأشرطه النحيفة و أفرديها بيدينك حسب السمك اللي يعجبك، تقدرين تسوين هذي الشابوره نحيفه أو سميكة حسب الرغبه. بعد ما تفردينها أنقلي الحبال اللي سويتي لصينية الفرن وخلي بينهم مسافة ١ إنش تقريبا.أدهني الحبال بالبيض بعدين رشيها بالشي اللي تبين تغطينها فيه ودخليها الفرن ١٥-٢٠ دقيقه أو إلين تتحمر وتستوي.
—————————————————————————————————————————————–
الجاكوند (نوع من الكيكات الإسفنجية) .. Jaconde Cake
الجاكوند نوع من أنواع الكيكات الإسفنجية اللي يستخدم فيها نوع مكسرات (غالبا لوز مطحون) مع الطحين. هذي الكيكة تستخدم للكيكات الأوروبية اللي تستخدم طبقات كثير زي اللي تنباع في المحلات مثل كيكات الموس وغيرها.
٦بياضات بيض على حراره الغرفه
٦ بيضات على حراره الغرفه
٢٨ جرام سكر
٢٢٥ جرام لوز مطحون
٢٢٥ جرام سكر مطحون
٧٠ جرام طحين
٤٠ جرام زبده مذوبه
( المقادير بالوزن ما عندي بالحجم )
سخني الفرن على ٤٢٥ بعدين غطي صينيتين فرن بورق زبده و أدهنيهم بزبده ذايبة
بإستخدام ال ٦ بياضات بيض و السكر العادي سويي مرانج لمرحلة الرؤوس الصلبة ( تلاقين الطريقة بالتفصيل بالمدونه )
الحين في صحن ثاني نظيف ( أو نفس الصحن بعد ما تنقلين المرانج لصحن ثاني وتنظفينه ) حطي اللوز المطحون مع البيض الكامل و السكر المطحون و أخلطيهم على سرعه عاليه إلين يتضاعف حجم الخليط ٣ أضعاف. نزلي سرعه الخلاط وحطي الطحين إلين يتجانس بس لا أكثر. الحين أضيفي المرانج اللي سوينا في الخطوه الأولى على الخليط هذا شوي شوي. بعد ما ينخلطون حطي الزبده الذايبه وحركيها معهم شوي شوي.
وزعي الخليط على الصينيتيين اللي جهزنا بعدين دخليهم الفرن ٥-٧ دقايق أو إلين تتلون بشكل خفيف. طلعيهم من الفرن وخليهم يبردون شوي بعدين أقلبيهم على فوطه مطبخ أو ورق زبده عشان تطلعينهم من الصياني.
—————————————————————————————————————————————–
بودينج الرز .. Rice Pudding
تخلطين ٤ أكواب و ٣/٤ كوب حليب كامل الدسم مع ٥ ملاعق كبيره سكر و ٣/٤ كوب رز قصير أو متوسط الحبه وتحطينهم في قدر وتخلينهم يوصلون غليه خفيفه. بعد ما يوصلون الغليه تضيفين عليهم عود فانيلا مقسوم أو ملعقة كبيره فانيلا سايلة. خلي الرز يطبخ إلين يصير لين ويثقل الخليط مع التحريك المستمر من وقت لوقت تقريبا ٣٥ دقيقه بياخذ. بعد ما يستوي الرز شيلي الفانيلا و حطي عليه ١/٢ كوب لوز شرايح محمص. مهم جدا في بودنج الرز إن نوعية الرز تكون قصيره أو متوسطة الحبه شخصيا أحب أستخدم رز الأربوريو حق الريزوتو بس تقدرين تستخدمين أي رز متوسط أو قصير الحبه. عمرك عمرك عمرك لا تفكرين حتى تسوين بودنج رز برز طويل الحبه زي البسمتي أو غيره.
بعد ما يخلص الرز حطي في صحن عريض ودخليه الثلاجه إلين يبرد تماما. الحين جيبي كوب قشطة خفق وثبتيه بملعقتين كبار سكر وسوي فيه كريمه مخفوقه لمرحلة الرؤوس الصلبة ( تلاقين طريقة الكريمة المخفوقه بالتفصيل في المدونة ) بعدين أخلطي الكريمة المخفوقه على البودنج البارد شوي شوي ودخليها الثلاجه إلين يبردون تماما تقريبا ٤ ساعات.
————————————————————————————————————————————————————————–
الهوت تشوكلت .. Hot Chocolate
الطريقة سهلة ، تجيبين كوب وربع حليب مع ربع كوب قشطة خفق وتخلينها توصل لغليه خفيفه بعدين تطفين النار وترمين عليها شكولاته غامقة من أحسن نوعية عندك وتحركين إلين تذوب (شوفي موضوع الشكولاته عشان تعرفين وش أقصد أحس نوعية) و سكر حسب الرغبة و أي إضافات ثانيه تحبين زي بهارات أو فانيلا أو غيره.
بالنسبة لي أسخن الحليب و القشطة مع نص عود فانيلا وبعدين أضيف شكولاته غامقة وبعدين آخر شي رشه ملح بحري (رهيب مع الشكولاته) بس الخيارا راجعلك.
————————————————————————————————————————————————————————–
كيكة الديفل فوود .. Devil Food Cake
كيكة الديفل فوود هي عكس كل شي تمثلة كيكة الآنجل فوود كيك. كيكة الديفل هي كيكة شكولاته بلون جدا غامق وتكون لينه ودسمة وبطعم شكولاته واااضح. الريد فيلفت هي أحد فرووع كيكة الديفل فوود.
كوب مويه مغلية
١١٣ جرام شكولاته بودرة dutched (شوفي موضوع الشكولاته إذا ما تعرفين وش المقصود)
٣٠٠ جرام سكر بني غامق
١٥٥ جرام طحين متعدد إستخدامات
١١٣ جرام طحين كيك
ملعقة صغيرة بيكنج صودا
١/٤ ملعقة صغيره ملح
كوب زيت
١٣٠ جرام ساور كريم
بيضتين
صفار بيضتين
* كل المقادير تكون على حراره الغرفه
* الميزان مطلوب هنا
* طحين الكيك تقدرين تسوين شي قريب له بإنك تشيلين من كل كوب طحين متعدد الإستخدامات ملعقتين كبار وتحطين بدالها نشا ذره.
سخني الفرن على ٣٢٥ وغطي صينية كيك بورق بارتشمنت.
أخلطي الشكولاته مع المويه المغليه في صحن وحركيهم مع بعض إلين يذوبون وبعدين خليهم عالجنب.
أخلطي السكر و الطحين و الملح و البيكنج صودا في خلاط أو عجانه مع بعض إلين يتداخلون بشكل جيد.
في صحن ثاني أخلطي البيض و الزيت و صفار البيض و الساور كريم مع بعض إلين ينخلطون زين بعدين أضيفي عليهم خليط المويه و الشكولاته بعد ما يبرد وحركيهم مع بعض زين.
الحين أخلطي المواد السايلة على الجامده شوي شوي و الخلاط شغال على سرعه خفيفه وكملي خلط إلين يتجانسون بس لا تخلطين أكثر من اللازم.
صبي الخليط في صينية الكيك ودخليها الفرن إلين يطلع منها عود نظيف تقريبا ٣٠-٣٥ دقيقه.
برديها في الصينية نص ساعة بعدين طلعي الكيكة من الصينية وخليها تبرد تماما.
————————————————————————————————————————————————————————–
كب كيك الموز .. Banana Cupcape
كب كيك الموز رهيييب خصوصا مع فروستنج البينت بتر (تحت)
كوب وربع طحين
ملعقة صغيره ونص بيكنج باودر
١/٢ ملعقة صغيره بيكنج صودا
١/٤ ملعقة صغيرة ملح
حبتين موز مستويه مررررره يعني تقريبا سوداء من برا
١/٢ كوب ساور كريم
ملعقة صغيره ونص فانيلا أو لو عندك عود فانيلا
٣/٤ كوب سكر
أصبع زبده دافي
بيضه + صفار بيض
سخني الفرن ل ٣٥٠ بعدين حطي ١٢ ورقة كب كيك في صينية كب كيك.
أنخلي الطحين مع البيكنج باودر و البيكنج صودا و الملح في صحن.
أهرسي الموز مع الفانيلا و الساور كريم في صحن ثاني.
أخفقي الزبده مع السكر في خلاط إلين تصير خفيفه وكريمية بعد ما تنخفق ضيفي عليها البيض و صفار البيض وأخلطيها شوي بعدين أخلطي عليهم الطحين وخليط الموز في ٣ دفعات على أقل سرعه. يعني تحطين ثلث الطحين بعدين نص خليط الموز وكذا.
وزعي الخليط على صحون الكب كيك ودخليها الفرن إلين يطلع منها عود نظيف تقريبا ٢٠ دقيقه ، خليها تبرد تماما قبل تاكلينها أو تزينيها بالكريمة.
—————————————————————————————————————————————–
بتركريم البينت بتر .. Peanut Butter ButterCream
كوب ونص سكر بودرة
علبه صغيره فيلادلفيا (٢٢٠ جرام) على حراره الغرفه
أصبع زبده على حراره الغرفه
١/٢ كوب بينت بتر ناعمه
رشة ملح
فول سوداني محمص للزينه
أنخلي السكر في صحن.
أخفقي الزبده مع الفيلادلفيا مع البينت بتر في صحن إلين يصير خليط خفيف بعدين ضيفي عليه كل السكر ورشه الملح و كملي خلط إلين يعطي فروستنج بقوام خفيف.
زيني الكب كيك بالفروستنج بعدين رشيه بالفول السوداني المحمص.

—————————————————————————————————————————————–
مربى التين بالسمسم .. Fig and Sesame Jam
كوب وربع سكر
٣/٤ كوب مويه
كيلو تين مقطوع من فوق وتحت ومقطع أرباع
شريطين قشر ليمون بدون الجزأ الأبيض المر ، يعني بالقشاره تشيلين شريطين بعدين تشيلين الجزأ الأبيض بسكين.
ملعقتين كبار عصير ليمون
١/٤ كوب سمسم محمص
أطبخي السكر و المويه إلين يذوب كل السكر بعدين حطي عليه التين و الليمون و القشر و أطبخيه على غليه جدا خفيفة إلين يثقل ويصير الخليط زي الشيره تقريبا ١ ٣/٤ ساعة – ساعتين . آخر شي أضيفي السمسم وحركيه شوي شوي معهم.
المربى تعيش شهر تقريبا في الثلاجه أو إذا تعرفين وشلون تعلبين تقدرين تعلبينها وتعيش سنوات
—————————————————————————————————————————————–
كيكة الريد فيلفت الأصلية (بالبنجر) .. The Original Red Velvet cake
٨٥ جرام شكولاته مره يعني حوالي ٩٩٪ كاكاو مقطعه
كوبين سكر
٤ بيضات
كوب ونص زيت
ملعقة ونص فانيلا
كوبين طحين أبيض
٢ وربع ملعقة صغيرة بيكنج صودا
رشة ملح
٣ علب وزن كل وحده ٣٤٠ جرام تقريبا بنجر . مصفيه من المويه ومخلوطة بالخلاط إلين تصير سايله . تأكدي إن البنجر ما يكون !!!! أقصد بنجر مطبوخ موب
التغطيه :
كوبين قشطة خفق
٣٤٠ جرام جبنة فيلادلفيا على حرارة الغرفة
٣٤٠ جرام جبنة ماسكاربوني
رشة فانيلا
كوب ونص سكر مطحون منخوله
سخني الفرن ل ٣٥٠
ذوبي الشكولاته
بعدين حطي البيض و الزيت و السكر و الفانيلا في صحن و أخلطي على سرعة هاديه حوالي دقيقة .
أنخلي الطحين و الملح و البيكنج صودا في صحن ثاني بعدين أخلطيهم مع الخليط الأول وبعد حركي شوي شوي إلين تنخلط زين . الحين حطي الشكولاته الذايبة و البنجر وحركي شوي بس إلين تنخلط بس . لو تبغين لون قوي كون هذي الكيكة ما تعطي نفس لون المحلات بقوه حطي ملعقة كبيرة ألوان أكل حمرا .
قسمي الخليط على ٣ صياني مدهونه ومرشوشة بطحين و أخبزيها بالفرن ٢٥- ٣٠ دقيقه أو إلين يطلع منها عود نظيف . خليها تبرد عشر دقايق بعدين أقلبيها وخليها تبرد زييييييين .
الحين للتغطيه ..
أخفقي القشطة حقت الخفق في صحن باااااااارد إلين توصل مرحله منقار الطير إلا شوي يعني تثبت شوي بس بعدين حطيها في الثلاجة .
الحين أخلطي الفيلادلفيا إلين تصير ناعمه شوي بعدين حطي عليها الماسكربوني وكملي خلط . الحين حطي الفانيلا و السكر و أخلطي زييين .
الحين حطي عليهم الكريمة اللي خفقناها شوي شوي .
رتبي الكيكة بإنك تحطين طبقة كيك بعدين طبقة تغطية بعدين طبقة كيك بعدين تغطية وكذا …
تقدرين تسوين منها كب كيك طبعا بنفس الطريقة وكل شي بس الريد فيلفيت في الأساس كيكة طبقات
—————————————————————————————————————————————–
مربى الفراولة .. Strawberry Jam
مشكلة الفراولة هي إنها ما تستحمل الطبخ وعشان كذا أغلب مربيات الفراولة البيتيه تطلع بطعم مطبوخ عكس كثير من اللي تشترينها جاهزة، هذي الطريقة تستخدم الفراولة في مكانين مره مع المربى ومره بعد ما نخلص عشان نضيف نكهة فراولة طازجة عالمربى. جودة المربى هنا بجودة الفراولة أفضل دايما إستخدام فراولة مجمده طعمها غالبا أحسن من الطازه.
٩ أكواب فراولة منظفه ومقطعه أرباع
كوبين سكر
٣ ملاعق كبيره عصير ليمون
بشر برتقاله (الجزأ البرتقالي بس يعني ما نبي الجزأ الأبيض اللي تحته).
أخلطي ٦ أكواب من الفراولة من السكر في قدر وبعدين أهرسيها بظهر مغرفه. حطي الخليط على نار وسط وخليها توصل لغليه شوي شوي مع التحريك و إزالة الرغوه من الوجه بين فترة وفترة. خليها تغلي على غليه خفيفه ١٠ دقايق بعدين حطي عصير الليمون مع ٣ ملاعق كبيره مويه. خليها تكمل طبخ تقريبا ٢٠ دقيقه مع التحريك و إزالة الرغوه بين كل وقت ووقت.
الحين نختبر المربى ، ناخذ صحن بارد من الثلاجه ونحط عليه ملعقة من الخليط بعدين نرجعه الثلاجه دقيقه ونشوف هل يجمد الخليط ولا يكون سايل زي ماكان. إذا جمد يعني خلص و إذا كان سايل نرجع الخليط عالنار ١٠ دقايق ثانيه ونرجع نختبر ونعيد نفس العملية إلين يجمد معنا.
بعد ما يجهز حطي باقي الفراوله و بشر البرتقال بعدين خليه يبرد أو علبيه.
—————————————————————————————————————————————–
كوكيز الكريسمس .. Chrismas Cookies
٣ أكواب طحين
٣/٤ ملعقة بيكنج صودا
ربع ملعقة صغيره ملح
أصبعين زبده على حراره الغرفه
كوب سكر
بيضه
ملعقة كبيره حليب
سكر بودره
أخفقي الزبده مع السكر و الملح في خلاط إلين يصير كريمي بعدين حطي عليهم البيضه و الحليب وأخلطي شوي . الحين نزلي السرعه شوي وحطي الطحين و البيكنج صودا بعد ما تنخلينهم مع بعض كملي خلط إلين تصير عجينه بعدين قسمي العجين نصين ولفيها بنايلون ورجعيها الثلاجه ساعتين .
سخني الفرن على ٣٧٥
الحين رشي الطاوله بسكر مطحون وأفردي وحده من العجين إلين يصير سمكها حوالي نص صانتي . أنتبهي طبعا إنك تشتغلين أكثر من اللازم أو يكون المطبخ حار مره كون الزبده لو ذابت هنا مشكله وبتصير العجينه مره صعبه تشتغلين عليها . عشان كذا لو لقيتي العجينه دافيه أكثر من اللازم حطيها في صينيه فرن وحطيها في الفريزر دقايق بس .
الحين بعد ما تفردين العجين قطعيها بالشكل اللي تبين بالقوالب حقت الكوكيز العاديه أو سكين أو كوب أي شكل تبين . بعدين أنقلي الأشكال لصينيه فرن مدهونه أو مغطيه ببارتشمنت أو سيلبات
حطيها في الفرن حوالي ٧ إلى ٩ دقايق إلين تتحمر من الأطراف بس ! طلعيها من الفرن وخليها تبرد دقيقتين قبل تشيلينها .
التغطيه :
أخلطي بياض بيضتين مع ٣ أكواب سكر بودرة بعدين أخفقيهم بخلاط إلين يصير منفوش شوي ولامع ، آخر شي أعصري عليهم عصير ليمونه وبس هذا الرويال آيسنج. لو لقيتيه خفيف مره زيدي سكر ولو لقيتيه ثقيل مره زيدي بياض بيض. تقدرين تنكهين الخليط بنكهات أو تلونينة بألوان بس أنتبهي من الألوان و النكهات هنا حاولي تتأكدين إن مافيها جلسرين (أقري المكونات بيكتبون) ، الجلسرين بيخلي الآيسنج سايل بدون ما يكون قشرة.

—————————————————————————————————————————————–
الجينجر سناب .. Ginger Snaps :
٢٧٠ جرام طحين
ملعقة صغيره ونص ملعقة صغيره بيكنج صودا
ملعقة كبيره زنجبيل مطحون بودره
نص ملعقة صغيره هيل
نص ملعقة صغيره قرنفل
نص ملعقة صغيره ملح
٢٠٠ جرام سكر بني غامق !!
١٤٠ جرام زبده على حراره الغرفه
٨٥ جرام دبس
بيضه على حراره الغرفه
ملعقتين صغار زنجبيل طازج مبشور
١١٣ جرام زنجبيل مسكر crystallized ginger إختياري !!!
سخني الفرن على ٣٥٠
سويي الطريقة الكريميه تلاقينها في موضوع الكوكيز
بعدين حطي تقريبا ملعقتين صغار من الخليط على بارتشمن وخلي بينهم مسافات
دخليها الفرن حوالي ١٥ دقيقه إلين تستوي وتتلون
—————————————————————————————————————————————–
كرمبل التفاح .. Apple Crumble :
تفضل الطريقة بس يبيلك تقيس بالنظر عاد لأن إحنا نسوي كميات كبيرة ونقسمها على صحون صغيرة.
أول شي للكرمبل :
٢٠٠ جرام زبدة دافيه
٢٠٠ جرام طحين
٢٠٠ جرام طحين لوز (لوز مطحون)
١٦٠ جرام سكر
رشة ملح
أخلط المواد هذي كلها مع بعض بيدك إلين يعطيك شي زي التراب تقريبا بعدين حطه في فرن ٣٧٥ إلين يصير ذهبي.
للتفاح المكرمل :
حبتين تفاح أخضر (أو أي تفاح طبخ أو حتى كمثرى بتطلع رهيبة هنا)
ملعقتين كبار زبدة
٣ ملاعق كبار سكر بني
٣ حبات هيل
عود قرفة
حبة قرنفل
كم حبة فلفل أسود
قشر التفاح بعدين شل القلب. قطع كل تفاحة ل ٨ أجزاء.
ذوب الزبدة وبعد ما تذوب حط السكر البني و البهارات وحركهم مع بعض إلين يذوب السكر. بعد ما يذوب حط التفاح وخله يطبخ إلين يتكرمل من جهة بعدين أقلبه وخله يتكرمل من الجهة الثانيه. التحكم بالحرارة أساسي ومهم هنا تأكد إن المقله ما تصير حاره أكثر من اللازم وينحرق التفاح عليك. بعد ما يتكرمل التفاح ويصير لين شله في صحن عالجنب.
…………
الحين صلح صوص كاراميل (تلاقي الطريقة في صفحة الوصفات).
كل هذي المكونات اللي فوق ممكن تتجهز قبلها بوقت وتنحفظ. الكرمبل في علبة تتقفل على حرارة الغرفة بيقعد كم يوم و التفاح المكرمل و الكراميل بتقعد في الثلاجه وقت طويل.
الحين تركيب الحلى :
جب صحن وحط فيه شوي تفاح مكرمل بعدين صوص كاراميل وبعدين كرمبل عالوجه ودخلهم فرن ٣٧٥ إلين كل شي يصير حار من جديد
—————————————————————————————————————————————–
موس المنجا .. Mango Mousse
نص كيلو منجا
١/٤ كوب + ملعقتين كبار سكر
ملعقتين كبار عصير ليمون
٣ ملاعق صغيره ونص جيلاتين
كوبين قشطة خفق بااااااردة
……………
قشري المنجا بقشارة خضار بعدين قطعي اللحم بسكين وحطيه مع السكر وعصير الليمون في خلاط مولينكس (أو أستخدمي منجا مجمده لو كنتي في الشتاء) أخلطي المنجا بشكل ممتاز إلين يصير ناعم بعدين صفيه بصفايه ناعمه.
خذي ربع الخليط وحطيه في قدر صغير بعدين حطي عليه الجيلاتين وخليه يقعد ٥ دقايق. الحين شغلي النار عليه وأستمري في التحريك إلين يذوب الجيلاتين تماما (ما يحتاج يغلي).
صبي خليط الجيلاتين على باقي خليط المنجا وحركيهم مع بعض زيييييييي إلين ينخلطون تماما.
الحين جيبي حمام ثلجي (يعني صحن فيه مويه وثلج) وحطي الصحن اللي فيه خليط المنجا فوقه (يعني فوق الثلج و المويه) و حركي الخليط عشان تبردينه بسرعه. بتلاقين الخليط يثقل معك إذا لقيتي فيه كتل صغيره بدت تتكون شيلي الصحن من الحمام الثلجي.
الحين سويي كريمة مخفوقة زي ما شرحت في موضوع الكريمة المخفوقه إلين توصل لمرحلة الرؤوس الصلبة.
حطي خليط المنجا عالكريمة وأخفقيهم زيادة إلين يتجانسون وبس هذا الموس.
—————————————————————————————————————————————–
سوفليه الموز .. Banana Souffle
زي أي وصفة سوفليه بفترض إنك عارفه ولو أساسيات بسييطة عن عملهم لأن اللي ممكن يصير خطأ كثير.
سوفليه الموز (رهيب مع صوص كاراميل أو حتى إسكريم كاراميل مملح أو سوربيه باشن فروت) :
ملعقة كبيرة طحين
١٠٠ مل حليب
نص عود فانيلا أو ملعقة صغيره فانيلا سايلة
ملعقتين كبار سكر
٤ موزات جدا جدا مستويه ، مهروسه ومصفيه بصفاية
صفار بيضتين
ملعقتين كبار زبدة + زيادة زبدة لدهن القالب
٣ بياضات بيض
………………………………………………
أخلطي الطحين مع الحليب والسكر والفانيلا (الأعواد) ورشة ملح في قدر صغير. شغلي النار وخليهم يوصلون لغليه خفيفه مع الخفق طول الوقت. خلي الخليط يغلي دقيقتين تقريبا بعدين طفي النار وحطي الموز و الزبدة و صفار البيض و الفانيلا السايلة لو كنتي بتستخدمينها وأخلطيهم زين مع بعض.
سويي مرانج ببياض البيض إلين يوصل مرحلة الرؤوس الصلبة بس لا تخفقينه أكثر من اللازم إلين يصير ناشف !
حطي المرانج على الأساس حق السوفليه على ٣ دفعات مع الخلط شويييي شوييي.
أدهني صحون سوفليه بزبدة بشكل جيد بعدين غطيها بسكر وشيلي السكر الزايد.
وزعي الخليط على ٣-٤ صحون سوفليه صغيرة (حسب الحجم بالضبط) وأمسحي الأطراف بعدين دخليها فرن ٤٠٠ تقريبا ١٢ دقيقة.
—————————————————————————————————————————————–
سوفليه الليمون .. Lemon Souffle
لكريم باتسييه الليمون :
نص كوب حليب
بشر نص حبة ليمون (الجزأ الأصفر بس بدون الجزأ الأبيض المر)
ربع كوب سكر
رشة ملح
١/٤ كوب نشا ذرة
٤ صفارات بيض
١/٢ كوب عصير ليمون
للمرانج :
٧ بياضات بيض
١/٣ كوب سكر
———————————–
للكريم باتسييه :
أغلي الحليب مع بشر الليمون في قدر.
أخفقي صفار بيضتين مع السكر و النشا و الملح وعصير الليمون إلين يصير خليط فاتح. صبي الحليب الحار على خليط البيض شوي شوي مع الخفق طول الوقت.
رجعي الخليط كله لقدر على حرارة وسط وأخفقي الخليط طول الوقت (عشان ما يتكتل) إلين يوصل غلية خفيفة. بعدي الخليط عن النار وخليه يبرد شوي بعدين أخفقي عليه الصفارين الباقيات.
للمرانج :
سويي مرانج ببياض البيض و السكر إلين يوصل مرحلة الرؤس الصلبة بس لا تخفقينه أكثر من اللازم !!
أخلطي المرانج على الأساس (مفروض يكون برد) على ٣ دفعات شوي شوي.
جهزي ٤ صحون سوفليه صغيرة وأدهنيها بزبدة وبعدين غطيها بسكر وشيلي السكر الزايد.
وزعي الخليط على الصحون الأربعة بعدين أمسحي أطراف الصحن ودخليها فرن ٤٠٠ إلين يرتفع السوفليه ويستوي ويتحمر شوي من فوق تقريبا ١٢-١٤ دقيقة.
—————————————————————————————————————————————–
الكلافوتي Clafoutis :
الكلافوتي معروفة ما يحتاج هي تقريبا بانكيك على كسترد كبير محشي كرز. الكرز في الأصل يتسوى بالكرز مع النوى حقه بس لو تبين تقدرين تستخدمين كرز منزوع النوى أو تشيلينه أنتي بنفسك بس أطعم فيه.
الكلافوتي Clafoutis :
١/٣ كوب + ملعقة كبيره سكر
ملعقتين كبار طحين
بيضتين
٢/٣ كوب حليب كامل الدسم
ملعقة صغيرة ونص فانيلا
نص ملعقة صغيره بشر برتقال
١/٤ ملعقة صغيرة خلاصة لوز
١/٤ ملعقة صغيره ملح
كوب كرز
نص ملعقة كبيره زبدة تقريبا مقطعه مكعبات صغيره.
سخني الفرن ل ٤٠٠
في خلاط أخلطي ١/٣ كوب سكر مع الطحين و البيض و الحليب و الفانيلا و اللوز و بشر البرتقال و الملح إلين يصير ناعم بس موب أكثر.
أدهني صحن فرن بشوي زبدة بعدين رصي الكرز في الصحن بحيث يكون طبقة وحده بس وبعدين صبي الخليط عليهم. دخلي الصحن الفرن ٢٠-٢٥ دقيقة أو إلين يستوي من فوق. طلعي الصينية من الفرن وشغلي الفرن عالشواية (يعين من فوق على أعلى حراره وحطي شبك الفرن فوق). رشي السكر الباقي فوق الكلافوتي وبعدين وزعي مكعبات الزبدة عليهم. دخليها الفرن مره ثانيه قريب من الشوايه إلين تتحمر من فوق ويتكرمل السكر شوي (أنتبهي لا تنحرق) . طلعيها من الفرن وكليها بعد ما تبرد شوي.
—————————————————————————————————————————————–

المادلين …. Madelene
٢٢٥جرام زبده على حرارة الغرفة
٢٢٥جرام طحين
٢٢٥جرام سكر
ملعقة فانيلا
ملعقتين شاهي بيكنج باودر
رشة ملح
٤بيضات
هذي الوصفة الأساسية يمديك تعدلينها لو تبين ، مثلا حطي قشر برتقال أو ليمون .
أو بدلي جزأ من الطحين ( بالوزن ) بجزأ لوز مطحون أو أي مكسرات مطحونه مثل عين الجمل مثلا . يمديك حتى تبدلين شوي بشكولاته.
أول شي إنخلي المواد الجافة مع بعض بدون السكر طبعا …بعدين سخني الجهاز.
بعدين أخلطي السكر و الزبده في خلاط كهرب إلين يسير كريمي ،
بعدين أخلطي الفانيلا و القشر لوكنتي تبين تستخدمين .
الحين أخلطي معاهم بيضتين و أخلطيهم إلين يتجانسون بعدين نزلي السرعة على أقل شي
وحطي نص الطحين بعدين عيدي نفس العمليه ، حطي باقي البيض بعدين باقي الطحين
و أخلطي .الحين يا تصبينها بكيس كريمة وهو أفضل شي صراحة . أو عادي زي ما تسوين بالعاده .
لو القالب يحتاج دهن أدهنيه بعدين صبي الخلطة إلين٢/٣الإرتقاع تقريبا ، أخبزيهم إلين يصيرون ذهبيين من برا.
—————————————————————————————————————————————–
بانا كوتتا .. Panna Cotta
في عدة طرق هذي طريقة جدا حلوه وتعطي بانا كوتا جدا جدا خفيف ….
بانا كوتتا .. Panna cotta
للأساس :
كوب قشطة خفق
عود فانيلا (أو ملعقة صغيره فانيلا سايلة)
رشة ملح
١/٢ كوب سكر بودرة
٢ ونص ملعقة صغيرة جيلاتين
ملعقتين كبار مويه باردة
للكريمة المخفوقة بالساور كريم :
٣/٤ كوب ساور كريم
١/٢ كوب كريمة بااااااارد
الطريقة :
للأساس :
في قدر صغير حطي الكريمة و السكر و الملح و عود الفانيلا (بعد ما تقسمينه وتشيلين البذور طبعا) وخليهم يوصلون غليه جدا خفيفه بعدين طفي النار.
والكريمة قاعده تطبخ حطي الجيلاتين عالمويه البارده وحركيها معها شوي بعدين خليها تتشرب المويه إلين توصل الكريمة للغليه. بعد ما تغلي الكريمة شيلي عود الفانيلا وحطي خليط الجيلاتين وحركيه مع الخليط إلين يذوب تماما.
أنقلي الأساس هذا لصحن خلط وخليه على طاولة المطبخ مع التحريك من وقت لوقت إلين يصير على حرارة الغرفة.
للبانا كوتتا :
أخلطي الساور كريم إلين يصير ناعم مره …
في صحن ثاني أخفقي الكريمة إلين توصل مرحلة الرؤوس الصلبة (شوفي موضوع الكريمة المخفوقة لو تبين تعرفين كيف).
أخلطي الكريمة المخفوقة عالساور كريم شوي شوي إلين تتمازج.
الحين بعد ما يبرد الأساس بشكل جيد أبدي حطي عليه الكريمة المخفوقة وحركيه معه شوي شوي. وزعي الخليط على صحون بانا كوتتا أو أي صحون بالشكل اللي تبين ودخليها الثلاجه إلين تجمد تقريبا ساعتين كذا ..
طلعيها من القالب بإنها تغمسين الصحن في مويه دافيه ثانيه وحده أو ثانيتين بس بعدين تقلبين البانا كوتتا على صحن.
قدميها مع أي كوليه أو صوص تحبين …
—————————————————————————————————————————————–
أوت مييل (عصيدة الشوفان) .. Oatmeal
أغلي ٣ أكواب مويه في قدر بعدين حطي عليها ملعقة صغيرة ملح و كوبين شوفان وتأكدي إنه مكتوب عالعلبه old-fashioned .. نزلي الحراره لوسط بعدين خليه يطبخ ٥ دقايق تقريبا أو إلين يصير ثقيل . حطي عليها كوب عصير تفاح + ١/٤ كوب سكر بني + كوب تفاح مكعبات + ١/٤ كوب زبيب + ١/٢ ملعقة صغيرة قرفة و أطبخيهم ٥ دقايق زياده أو إلين يلين التفاح .. قدمي عالوجه مكسرات محمصه .
—————————————————————————————————————————————–

» المعجنات الحلويات والفطور Desserts and breakfast
» المعجنات الحلويات والفطور Desserts and breakfast
» المعجنات الحلويات والفطور Desserts and breakfast 5
» االمجنات، الفطور و الحلويات .. Desserts and Breakfast
» سر نجاح الحلويات والمخبوزات